Супертўпурар машғулотларда қатнашишдан бош тортди

Европа футболидаги энг зўр тўпурарлардан швециялик Виктор Дьёкерешнинг “Спортинг” билан муносабати тамомила бузилди.

Record нашрининг ёзишича, моҳир ҳужумчи лиссабонликларнинг ёзги ўқув-машғулот йиғинларида қатнашишдан бош тортди. Футболчи бу қарорга клуб президентининг баёнотидан кейин келди ва мақсадини раҳбариятга етказди.

“Спортинг” хўжайини Фредереку Варандаш “Мен Дьёкерешнинг нархини айтмайман, буни унинг ўзи яхши билади. Шуни аниқ айтишим мумкинки, Виктор 60+10 миллион еврога сотилмайди, у шунчаки жамоадан кетолмайди”, деб баёнот берган эди.

Манбаларга кўра, ўтган йили ёзда томонлар ҳужумчи яна бир йил ўйнаши ва кейин ўта қиммат бўлмаган нархда бошқа клубга ўтиши мумкинлиги борасида оғзаки келишиб олган экан. Бироқ клуб Дьёкереш бўйича келган таклифларни қабул қилмаяпти.

Виктор клуб раҳбари уни алдаганлигини ва келишувга амал қилмаётганини таъкидлаб, “Спортинг” сафида бошқа майдонга тушмаслигини уқтирмоқда.

Лиссабонга 2023 йили ёзда олиб келинган 27 ёшли форварднинг клуб билан амалдаги шартномаси 2028 йилнинг 30 июнигача давом этиши белгиланган.