"Сурхон" ва "Навбаҳор" жамоалари ўртасида қайд этилган энг йирик ҳисоб эсингиздами? (превью)

Coca Cola Суперлигасининг 23-турида "Навбаҳор" сафарда "Сурхон" меҳмони бўлади.   

Мазкур клублар шу кунгача миллий чемпионатларимиз тарихида ўзаро 33 марта рўбарў келган. Ушбу ўйинларнинг 23 тасида “лочинлар”нинг қўли баланд келган (битта ўйинда “Навбаҳор”га техник ғалаба ёзилган) бўлса, 6 тасида термизликлар ғалаба қозонишган, 4 та баҳсда эса жамоалар муроса кўчасини танлашган. Тўплар нисбати – 82:23, “Навбаҳор” фойдасига.

Ўзаро учрашувларда “Навбаҳор” 73 очко, “Сурхон” эса 22 очкони қўлга киритган. 

Ушбу жамоалар ўртасидаги ўйинлардаги энг йирик - 9:0 ҳисоби 1997 йили Наманганда қайд этилган. Таъкидлаш жоизки, наманганликлар ўтказилган 33 та баҳснинг 12 тасида термизликлар устидан йирик ҳисобда зафар қучишган. 

“Сурхон” ҳамда “Навбаҳор” клублари бунгача Термизда 16 марта куч синашишган. Мазкур ўйинларнинг 6 тасида “учар тулпорлар” ғалаба қозонишган бўлса, яна 6 тасида “лочинлар” зафар қучишган, 4 та ўйинда эса дуранг натижа қайд этилган.        

“Сурхон” ўз майдонида ўтказилган ўзаро учрашувларда “Навбаҳор” дарвозасини 19 марта ишғол этган бўлса, наманганликлар Термизда “учар тулпорлар” дарвозасига 28 та тўп киритишган.

Мазкур жамоаларнинг Coca Cola Суперлигасининг 10-туридан ўрин олган, жорий йилнинг 14 май куни Намангандаги “Марказий” стадионида бўлиб ўтган баҳсида Жасурбек Яхшибоев учрашувнинг 42-дақиқасида пенальтидан гол уриб, наманганликларнинг 1:0 ҳисобидаги ғалабасини таъминлаганди.   

Эслатиб ўтамиз, “Сурхон” – “Навбаҳор” жамоалари ўртасидаги учрашув 27 октябрь куни Тошкентдаги “Пахтакор” марказий стадионида соат 18:00 да старт олади.