"Surxon"da vaziyat qanday? Bahrom Haydarov klubdan ketmoqchi bo‘lgan, ammo...

Bugun OAV orqali “Surxon” klubida bosh murabbiy o‘zgarishi haqidagi xabarlar keng tarqaldi. Bunga esa jamoaning oxirgi paytlardagi muvaffaqiyatsiz o‘yinlari sabab bo‘lmoqda.

Pandemiyadan keyin davom ettirilayotgan chempionatimizda “Surxon” klubi hozirgacha bir durang va ikki mag‘lubiyat qayd etdi. Natijada bosh murabbiy lavozimida ishlab kelayotgan Bahrom Haydarovning iste’foga chiqarilgani haqidagi xabarlar ko‘paydi.

Aytish kerakki, u jamoani ikkinchi tur oldidan qabul qilib olgandi va debyut o‘yinini Navoiyda “Qizilqum”ga qarshi o‘tkazib, uch ochkoni qo‘lga kiritgandi. Shundan so‘ng esa “Nasaf”ga imkoniyat boy berildi. Umuman olganda, hozirga qadar “Surxon” Haydarov boshchiligida bir g‘alaba, bir durang va uch bor mag‘lubiyatga uchradi.

Oxirgi uchrashuvni esa “Qo‘qon-1912” maydonida o‘tkazib 0:3 hisobida yutqazdi. Bugun tarqalgan xabarlarga qaraganda, termizliklarni hozirda ishsiz yurgan rossiyalik Aleksandr Xomyakov boshqarishi aytilmoqda. Lekin bu xabar ham hozircha rasman tasdig‘ini topgani yo‘q.

Boisi, vaziyatga oydinlik kiritish uchun Aleksandr Andreevich bilan bog‘langanimizda hali hech bir klub bilan rasmiy kelishuvga erishmaganini aytdi. Bundan ko‘rinib turibdiki, u “Surxon”da ish boshlagani yo‘q. Lekin bizdagi ma’lumotlarga qaraganda, chindan ham klub Xomyakov bilan aloqaga chiqqan va muzokaralar olib borilgan.

Shundan so‘ng, biz voqealar rivoji qanday tus olayotganini yanada aniqlashtirish maqsadida Bahrom Haydarov bilan aloqa o‘rnatdik. Chunki hozirgi vaziyatda uning o‘zidan boshqa hech kim klubdan ketgan yo ketmaganligi haqida aniq javobni ayta olmasdi. Shuni inobatga olgan holda, u bilan bog‘lanib, vaziyatni tushuntirganimizda aslida nimalar bo‘layotganini aytgan holda hali “Surxon”dan rasman ketmaganini ma’lum qildi.

-  To‘g‘ri, “Qo‘qon-1912”ga qarshi o‘yindan keyin klubdan ketgandim. Lekin rahbariyat meni yana chaqirib, jamoada ishlashimni xohlamoqda. Ertaga rahbarlar bilan bu masalada gaplashib olamiz, - deya javob qaytardi, Haydarov.

-  Demak, hali “Surxon”dan rasman ketganingiz yo‘q, shundaymi?

-  Ha, hali ketmadim.

-  U holda nima uchun iste’foga chiqishni xohladingiz?

-  Ayrim masalalar bor, buni ayta olmayman. Bu klubning ichki ishi.

-  “Paxtakor”ga qarshi uchrashuvga ham jamoani o‘zingiz olib tushasizmi?

-  Ertaga aniq bo‘ladi. Aslida bugun Toshkentga jamoadan ketganimni aytmoqchi bo‘lib, xayrlashgani kelgandim. Ammo ruxsat berishmayapti.

Xullas, “Surxon”da shunaqa gaplar. Anig‘i shuki, Haydarov ketgani yo‘q, bunga o‘zingiz ham yuqorida bildirgan fikrlari orqali amin bo‘ldingiz. Tez orada barchasi yanada oydinlashadi. Shunday ekan, voqelar rivojini kuzatib boramiz.