"Таклиф бўлса ўйнайман, бўлмаса фаолиятимни тугатиб қўявераман" - Жўрабоев "Бухоро"дан нима учун кетди?

Биринчи даврадан кейин “Бухоро” сафини тарк этаётган футболчилар давом этяпти. Бу сафар ҳимоячи Обид Жўрабоев жамоани тарк этди. Наманганда “Навбаҳор”га қарши учрашув унинг “Бухоро”даги сўнгги ўйини бўлиб қолди. Sports.uz мухбири эса Жўрабоев билан суҳбатлашди.

- Биринчи давра тугаганини ҳисобга олсак, “Бухоро”нинг иштироки ҳақида нималарни айтган бўлардингиз?

- Жамоа билан хайрлашган бўлсам-да, биринчи давра ўйнадим, деярли барча баҳсда. Фақат “Андижон” билан беллашувда майдонга тушмадим ва “Навбаҳор”га қарши ўйинда Аббос Отахонов жароҳат олгач, мажбурий ўзгариш сифатида ўрнига тушдим. Ўйнаган ўйинларимда қўлимдан келганича жамоамга ёрдам беришга ҳаракат қилдим. Жамоа ёмон ташкил топмаганди. Нимадир бўлди, кўз тегди. Орада бош мураббий ҳам ўзгарди. Ғалабалар бўлмагач, футболчилар руҳий тушкунликка тушиб қолишди. Ҳаммага раҳмат айтаман. Мураббий ҳам ўз ўйинчиларини ўйнатади ва тактикасига мос тушадиган футболчиларни олиб келади. “Навбаҳор” билан учрашувдан кейин дўстона хайрлашдик.

- Кетишингизга нима сабаб бўлди? Тўсатдан юз бердими ёки...

- Мураббий билан олдин гаплашганимда иккинчи даврада сени жамоада кўрмаяпман, лекин биринчи давра тугагунча шу ерда ўйнаб тургин деди. Шунинг учун биринчи давранинг охирги ўйинида Наманганда жамоадошларим билан хайрлашдим. Мураббий олдинроқ иккинчи даврада сени ҳисобга олмаяпман деб огоҳлантирганди.

- Бундай муносабатдан хафа бўлмадингизми?

- Нега хафа бўламан? Бу – футбол. Қачондир шундай бўлиши керак. Айтяпман-ку, ҳамма мураббий ҳам тактикасига мос тушадиган ўйинчиларни ўйнатгиси келади. Балки мен унинг ўйин услубига тушмагандирман. Лекин хафа бўлганим йўқ. Дўстона хайрлашиб кетдим.

- “Бухоро”дан кўпчилик кетяпти. Иккинчи даврада кучайтирилишини эшитяпмиз. Сизнингча, биринчи даврадаги таркиб нисбатан кучсизроқмиди?

- Бошида яхши жамоа эди. Шерикларимга ишонгандим. Бир-иккита учрашувдан кейин йигитлар руҳан тушкунликка тушиб қолишди. Шу билан ушбу ҳолатдан жамоа чиқиб кета олмади. Ҳолбуки, бош мураббийни ўзгартиришди. Бақоев ўз услубига эга бўлган мутахассис. Ўзини тактикасини қўллади, барибир ижобий ўзгариш бўлмади. Ўйлайманки, иккинчи даврада янги йигитларни олиб келишса, жамоа кучаяди. Суперлигада қолишга ҳаракат қилишади.

- Айни пайтда режангиз қандай?

- Ҳозир уйда, оилам даврасидаман. Агар яхши клублардан таклифлар бўлса давом эттираман. Узоқда юравериб ҳам чарчадим. Фарзандларимни дийдорига кам тўйяпман. Бу пешона. Ризқ Аллоҳдан, таклиф бўлса ўйнайман, бўлмаса фаолиятимни тугатиб қўявераман. Балки иккинчи даврада про лигада “Навбаҳор-фарм”да Рашид ака Ғофуровга ёрдам беришим ҳам мумкин.

Шуҳратбек Жўраев.