Тчуамени Вальверде билан бўлган можаро ҳақида гапирди

"Реал" ярим ҳимоячиси Орельен Тчуамени жамоадоши Федерико Вальверде билан бўлган муштлашув ҳақида фикр билдирди.

Эслатиб ўтамиз, аввалроқ "Реал" футболчилари 7 май куни машғулотда жанжаллашиб қолгани, натижада Вальверде касалхонага ётқизилгани - унда бош мия жароҳати аниқлангани ва унга чок қўйиш кераклиги ҳақида хабар берилган эди. Жамоадошлар бундан бир кун олдин жанжаллашишни бошлаган эди. Клуб иккала футболчини ҳам 500 минг евро миқдорида жаримага тортди.

“Вальверде? Мен вазиятни аниқлаштирмоқчиман. Нимадир содир бўлгани аниқ. Аммо оммавий ахборот воситалари бу воқеани жуда бўрттириб юборди. Ҳар хил бўлмағур гапларни ўқидим. "Уришиш", "муштлашиш" - бунақа гаплар йўқ эди. Тафсилотларга тўхталмайман.

Феде билан бизнинг умумий мақсадимиз битта - "Реал" учун совринларни қўлга киритиш. Орамизда ҳеч қандай муаммо йўқ", - деди Тчуамени.