Теренс Крофорд туғилган кунида полиция томонидан қўлга олинди

27 сентябрдан 28 сентябрга ўтар кечаси АҚШнинг Небраска штати, Омаҳа шаҳрида полиция патрули машҳур боксчи, иккинчи ўрта вазн тоифасида мутлақ жаҳон чемпиони Теренс Крофордни автомобил бошқараётганда тўхтатди. Бу ҳақда "ТМZ" хабар бермоқда.

Патрул ходимлари боксчи бошқарувидаги машина эҳтиётсиз ҳаракатлангани учун тўхтатган. Машина кўздан кечирилаётганда офицерлардан бири Крофордда қурол борлигини пайқаган ва эҳтиёт чораси сифатида унга тўппончасини ўқталган. Спортчи эса: "Мен ҳеч қандай қуролга қўл узатмоқчи эмасман", дея тинчликка чорлаган.

Крофорд қўлга олиниб, ҳужжатлари текширилганидан сўнг, унда қурол олиб юришга рухсатномаси борлиги аниқланди. Натижада у қўйиб юборилиб, фақатгина эҳтиётсизлик билан машина ҳайдаш бўйича айблов қўйилди.

Қизиқ жиҳати шундаки, бу воқеа боксчининг туғилган кунида, унинг шарафига шаҳарда ўтказилган параддан бир неча соат ўтиб содир бўлган.