Тезкор: Ҳусановнинг аҳволи бўйича маълумот чиқди!
Ўзбекистон миллий терма жамоаси марказий ҳимоячиси Абдуқодир Ҳусанов Англия Премьер-лигасининг учинчи турида “Брайтон”га қарши ўтказилган учрашувнинг 85-дақиқасида шикастлангани учун захирага олинган эди.
Кейинчалик ўтказилган тиббий текширувлар 21 ёшли легионернинг чап оёғи мушаклари жароҳатини тасдиқлади.
Тиббиёт бўлими мутасаддилари маслаҳатлашган ҳолда Ҳусановни Ўзбекистон миллий терма жамоаси ўйинларига юбормасликка қарор қилди.
Маълумки, 2026 йилги жаҳон чемпионатига йўлланма олган Ўзбекистон миллий терма жамоаси ФИФА кунлари давомида саккизта мамлакат терма жамоалари иштирокида ўтказилаётган “CAFA Nations Cup 2025” халқаро турнирида иштирок этмоқда.
Бу мусобақа ўзбекистонлик чарм тўп усталари мундиалга тайёргарликнинг муҳим босқичи вазифасини ўтаб бериши билан аҳамиятли.
Таъкидлаш жоизки, Англия футболи экспертлари Ҳусановнинг жароҳат олиб, сафдан чиққанини Манчестер дербиси олдидан катта йўқотиш сифатида баҳоланди. Чунки “шаҳарликлар” мезбонлик қиладиган тўртинчи тур учрашувида ўз шаҳрида меҳмон сифатида ўйнайдиган Рубен Аморимнинг “Манчестер Юнайтед”и асосий эътиборини ҳимояга қаратган ҳолда қарши ҳужумларга таяниб ҳаракат қилади.
Бундай ўйин услубида Хосеп Гвардиолага Абдуқодир Ҳусановнинг тезкорлиги, курашувчанлиги ва майдонни яхши кўра олиш қобилияти жуда қўл келиши таъкидланмоқда.
Шу боис, “Сити” шифокорлари ўзбек футболчисини тезроқ оёққа турғазишга ҳаракат қиляпти. Қолаверса, Англия терма жамоасига чақиртирилган Жон Стоунзнинг ҳам жароҳат туфайли клубга қайтариб юборилгани Гвардиолага қўшимча бош оғриқ бўлди.
Manchester Evening News нашри журналисти Тайрон Маршалл Абдуқодир Ҳусановнинг тўлиқ даволаниши икки ҳафта вақт олишини маълум қилди. Бу борада ФИФА кунлари муносабати билан эълон қилинган қисқа муддатли танаффус “шаҳарликлар” учун айни муддао бўлди.
- Энди “Манчестер Сити”нинг бор умиди Абдуқодир Ҳусановнинг Манчестер дербисигача оёққа туриши билан боғланган. Икки ҳафталик ҳордиқ ва даволанишдан кейин ёш ҳимоячида майдонга қайтиш имконияти юқори, - деб ёзди somosfanaticos.fans сайти.
Англиядан олинган сўнгги хабарларга кўра, Ҳусановнинг даволаниш жараёни яхши давом этмоқда ва ҳимоячимиз тез кунларда индивидуал машғулотларни бошлайди. Шундан сўнг, легионеримиз умумий гуруҳ машғулотларига қўшилади ва “Манчестер Юнайтед” билан бўладиган баҳсга тайёргарлик кўради. Бу албатта, ўзбекистонлик футбол ишқибозлари учун ҳам хушхабар.
Англия Премьер-лигасининг тўртинчи туридан ўрин олган “Манчестер Сити” ва “Манчестер Юнайтед” ўртасидаги учрашув 14 сентябрь куни Тошкент вақти билан соат 20:30 да бошланади.
Фикрлар