Токио-2020. Бугун Ўзбекистон номидан қатнашган 5 спортчидан фақатгина бир нафари кейинги босқичга ўтди, қолганларчи?

Токио-2020 Олимпия ўйинларининг еттинчи кунида 5 нафар ҳамюртимиз иштирокидаги баҳслар гувоҳига айландик.

1.Бекмурод Олтибоев (дзюдо, эркаклар +100 кг)

2.Бобоусмон Батуров (бокс, эркаклар -69 кг)

3.Райхона Қодирова (бокс, аёллар, -60 кг)

4.Роксана Худоярова (уч хатлаб сакраш, аёллар, саралаш)

5.Наталья Критинина (сузиш, аёллар, 50 м эркин усулда)

Дзюдо. +100 кг вазнда баҳсларга киришган Бекмурод Олтибоев мўғулистонлик Дууренбаяр Улзибаярга қарши баҳсда вакилимиз иппон баҳоси эвазига ўз юришини давом эттирадиган бўлди. Унинг 1/8 финалдаги рақиби Хенк Грол. Нидерландиялик спортчи бунга қадар Пекин ва Лондон Олимпиадасида бронза медалларини қўлга киритганди. Эътиборга молик томони, Олтибоев тажрибали рақибини илк сониялардаёқ иппон баҳоси эвазига енгди ва чорак финалга чиқди. Ҳамюртимиз бу босқичда чехиялик Лукаш Крпалек билан беллашди. У ҳам Олимпиада чемпиони ҳисобланарди.

Асосий вақтда Бекмурод вазари баҳоси эвазига Лукашга мағлуб бўлди. Аммо ҳали медаль учун имконият йўқ эмасди. Олтибоев бронза медали учун ўтиш баҳсида украиналик Якив Хаммога қарши татамига кўтарилди. Вакилимиз курашда Якивдан енгилди ва турнирни медалсиз якунлади.

Бокс. -69 кг вазн тоифасида баҳсларга киришган Бобоусмон Батуров 1/4 финал босқичида Буюк Британиядан ташриф буюрган Пэт МакКормакка қарши рингга кўтарилди. Ғолиб ярим финалга йўл оларди! Афсуски, Бобоусмон рақибига 4:1 ҳисобида имкониятни бой бериб, Олимпиада билан хайрлашди.

-60 кг вазнда Райхона Қодирова конголик Наоми Юмбага қарши рингга чиқди. Беллашувда вакиламиз Конго Демократик Республикаси аъзосига умуман имконият қолдирмади ва 5:0 ҳисобида мағлубиятга учратди. Райхона Қодировани чорак финалда бразилиялик Беатрис Феррейра Соарес кутиб турибди. Соарес 2019 йилги жаҳон чемпиони ҳисобланади.

Енгил Атлетика. 3 хатлаб сакраш баҳсларида иштирок этган Роксана Худоёрова ўзининг илк уринишида 12.63 метр масофага сакради ва онлайн жадвалда 17 спортчи орасида 11-ўринга жойлашди. Иккинчи уринишда 13.02 метр кўрсаткични қайд этиб, онлайн жадвалда 13-поғонани банд этди. Худоёрова сўнгги уринишда 13.01 метр натижа билан 14-поғонани эгаллаган ҳолда, Олимпиада билан хайрлашди. Финалга йўл олган энг паст кўрсаткич эгасининг натижаси 14.21 метрни ташкил этди.

Сузиш. Наталья Критинина 50 метрга эркин усулда сузиш баҳсларида 26.93 сония натижани қайд этиб, 8 кишилик гуруҳнинг сўнгги поғонасида финишга етиб келди. Маълумот учун, энг яхши натижага эришган 16 спортчи кейинги босқичга йўл олади. Иштирокчилар сони эса 83 тани ташкил этади.

Қолган гуруҳлардаги 16 нафар спортчининг натижаси 26.93 сониядан яхши бўлганлиги учун, Критинина Олимпиада билан хайрлашди.

Эртага июль ойининг сўнгги кунида 9 нафар ўзбекистонлик спортчи Токио-2020 ёзги Олимпия ўйинларида иштирок этади.

Қуйида ушбу спортчиларимиз билан танишиб олишингиз мумкин:

1.Шаҳобиддин Зоиров (бокс, эркаклар 48-52 кг) – 07:30

2.Мухтасар Тохирова (ўқ отиш, аёллар) – 08:00

3.Элнур Абдураимов (бокс, эркаклар 57-63 кг) – 08:51

4.Ўзбекистон дзюдо терма жамоаси Нидерландия терма жамоасига қарши жамоавий беллашувларда иштирок этади.

Маълумот учун, дзюдо бўйича жамоавий баҳсларда ҳар бир терма жамоадан 3 нафар эркак, 3 нафар аёл, жами 6 нафардан спортчи қатнашади.