Токио-2020 ўйинларида иштирок этган энг ёш спортчиларимиздан бири олимпиада рекордини янгиламоқчи

Оғир атлетика бўйича Токио-2020 Олимпия ўйинларида юртимиз шарафини ҳимоя қилган вакиламиз Кумушхон Файзуллаева -76 кг вазн тоифасида даст кўтаришда 101 кг, силтаб кўтаришда 126 кг, умумий ҳисобда эса 227 кг натижа қайд этди. Ҳамюртимиз бу билан Олимпиадани олтинчи поғонада якунлади. 

Истеъдодли спортчимиз Туризм ва спорт вазирлиги матбуот хизматига берган интервьюсида келажакда ўз натижаларини яхшилашга ваъда берди.

"Мақсадим, Олимпия ўйинлари ғолиби бўлиб, Ўзбекистон байроғини юқорига кўтариш ва мадҳиясини янгратиш. Ушбу мақсадимдан асло қайтмайман. Кўпчилик қиз бола эканлигим, турмушга чиқиб, оила қуришим кераклигини айтишади. Ҳали ёшман ва бунга насиб қилса эришаман. Токио-2020 мен учун жуда катта мактаби бўлди. Энди 2024 йили Парижда бўладиган Олимпия ўйинларида ҳам қатнашиб, она Ватаним байроғини юқорига кўтариш учун астойдил ҳаракат қиламан. Асосий мақсадим, олимпиада рекордини янгилаб, Ўзбекистон номини тарихга муҳрлаш. Агар Парижда чемпион бўлсаму, лекин рекордни янгилай олмасам, мақсадимни кейинги Олимпиадада албатта амалга оширишга ҳаракат қиламан" - деди Кумушхон.