Топ-клублар Родригонинг юқори маошидан қўрқмоқда

"Реал Мадрид" ҳужумчиси Родриго Гоэснинг катта маоши унинг трансферига асосий тўсиқлардан бирига айланмоқда. Бу ҳақда "The Telegraph" нашри журналисти Мэтт Лоу маълум қилди.

Маълумотларга кўра, 24 ёшли футболчи йиллик 10 миллион фунт маош олмоқда ва бошқа клубга ўтиш ҳолатида даромадини оширишни истайди. Шу боисдан, кўплаб катта клублар унга қизиқиш билдирса-да, шартномани амалга оширишдан қўрқмоқда.

"Мен Родригонинг трансфери бўйича вазиятни ҳеч қачон жиддий деб ҳисобламаганман. Унинг маоши жуда юқори, агар кетса, янада кўпроғини талаб қилади. Агар нимадир нотўғри кетса, бу клуб учун катта муаммога айланади" – деди Лоу "London Is Blue" подкастида.

Шунингдек, у "Челси" мисолида Рахим Стерлингнинг вазиятини келтириб ўтди. Родриго билан шунга ўхшаш муаммолар юзага келиш эҳтимоли борлиги таъкидланди.

Эслатиб ўтамиз, Родригога "Арсенал", "Ливерпуль" ва "Ан-Наср" клублари ҳам қизиқиш билдиргани ҳақида аввалроқ хабарлар тарқалган эди.