Топурия ва Холлоуэй ўртасида "даҳшат" жанг бўлади. Анъана бузилади! (Сўровнома)

"UFC 308" турнирининг марказий жанги ярим енгил вазн (65,8 кг) тоифаси чемпиони Илия Топурия ҳамда Макс Холлоуэй ўртасида кечади.  Волкановскидан чемпионликни тортиб олган Топурия титулини ҳимоя қила оладими. тез кунларда билаиб оламиз. Биз ушбу жанг борасида ҳам ўзбекистонлик яккакураш усталарининг фикрлари билан қизиқдик. 

Мирзоҳид Атабаев -мураббий 

- Макс Холлоуэй жуда тажрибали ва октагонни, рақибни ҳис қилиш қобилияти юқори жангчилар сарасига киради. Топурияни ҳам жуда савияли ва айёр жангчи сифатида биламан. Ҳақиқий сола-сол бўлади. Менимча Холлоуэй бу жангда кардиосининг юқори эканлиги, зарба кўтара олиш қобилияти эвазига ғалабани илиб кетса керак. Имкониятлар 55/45 Холлоуэй! 

Ҳусан Мажлимов -мураббий

- Қизиқарли ва томошабоп жанг бўлади. Илия Топурияда тезлик, куч, "панчер"лик салоҳияти жуда зўр шакилланган. Бироқ, Топурия дастлабки 2 раундда ғалабани ўз томонига оғдира олмаса, кейин қийин бўлади. Холлоуэй 5-раундлик жангларни жуда кўп ўтказган ва унда нафас олиш системаси жуда яхши ривожланган. Айнан шуни эвазига у ғалаба қозониш имкониятига эга. Имкониятлар 50/50. 

Шуҳратбек Абдумуталибов - мураббий

- Мухлислар маза қилиб томоша қиладиган жанг бўлади. Ҳар иккиси очиқ ва ёрқин жанг кўрсатадиганлар тоифасига киради. Тўғри, Макс жуда зўр жангчи. Бироқ, бу жангда амалдаги чемпион Топурияни имкониятини юқори баҳолаган бўлардим. Холлоуэй фаолияти мобайнида нокаут ёки нокдаунт бўлмаган. Аммо бу сафар бу анъана бузилади. Топурия муддатидан аввал техник нокаут билан ғалаба қозонса керак. Имкониятларни 70/30 дея баҳолаган бўлардим. 

Машрабжон Рўзибоев - ММА жангчиси

- Иккисининг жанг олиб бориш услуби менга жуда ёқади. Макс Холлоуэй зўр жангчи ва ҳар доим мухлисларга ёқадиган жанг кўрсатади. "Стойка"да анча-мунчасига "дарс" бериб қўяди. Аммо Топурия ҳозир бошқа даражада десам хато қилмаган бўламан. Демоқчиманки, унинг энг "гуллаган" даври. Иштиёқ юқори, "ёниб" турибди. Менимча бу жангда Топурия ғалаба қозонса керак. Имкониятларни 60/40 дея баҳолаган бўлардим. 

Достон Бозоров -ММА жангчиси

- Тўғри, Топурия чемпион ва у Холлоуэйни бир неча бор мағлуб қилган Волкановскини нокаутга учратди. Бироқ, бу Холлоуэйни ҳам шу тарзда мағлуб этади, дегани эмас. Жангга ким қанчалик яхши тайёргарлик кўрган бўлса, ўшанда имконият кўп бўлади. Тўғриси, Топурия дастлабки раундларда нокаут қила олмаса, қолган раундларда Холлоуэйни имконияти ошиб кетади. Менимча Макс Холлоуэй очколарга кўра ғалаба қозонади. Имкониятларни 60/40 деган бўлардим. Албатта Холлоуэй фойдасига!

Наврўз Отақулов - мураббий

- Бу жанг анонс қилинганидан кейин мухлислар, мутахассислар томонидан Илия Топуриянинг имконияти юқори баҳоланди. Мен эса аксинча фикр билдираман. Бу жангда Холлоуэйнинг ғалаба қозониш имконияти яхши. Чунки у жуда тажрибали, оёқ-қўлларида зўр ишлайди,зарбалар кўтара олади. Кардиоси ҳам яхши. 5 раундлик жангларни жуда кўп ўтказган. Энг асосийси эса унда қўрқув йўқ ва ҳарактерли жангчи ҳисобланади. Менимча очколарга кўра Холлоуэй ғалаба қозонса керак. Имкониятлар 60/40 Холлоуэй!