"Тоттенхэм" Бэйлни сотиб нима топди? Кирикешдан Эриксонгача

Баъзан, биргина юлдузга суянган жамоа узоқ турмаслиги ҳақидаги фикрлар қулоғимизга чалинади. Кўплаб менежерлари бундай ижрочиларни катта суммага сотиб, бир нечта кучли футболчини жамоага таклиф этиш фойдали деб ҳисоблайди. 2013-йилда "шпорлар" ҳам шундай қарор қабул қилгани ҳозир кўпчиликнинг ёдида эмас. Ўша йилнинг ёзида "Тоттенҳем" Гарет Бэйлни "Реал"га 85 миллион фунт эвазига қўйиб юборади.

Трансферлар учун ажратилган сумма 109 миллион фунтдан ортиб кетганига қарамай, клуб ўзи истаган натижага эриша олмади. Бэйлнинг ўрнини тўлдириши кутилган "қойилмақом еттилик" айтарли ҳеч қандай натижа кўрсатмади.

Шунча йил ўтиб, нега энди бу воқеалар ёдга олинди деб ҳайрон бўляпсизми? Ўша еттиликнинг энг сўнгги вакилли - Эрик Ламела шу кунларда "Севилья" билан шартнома имзолаш арафасида турибди. Келинг, бироз ортга қайтган холда, трансферлар қай даражада самара бергани борасида фикр алмашамиз.

Роберто Солдадо (ҳужумчи, 26 миллион евро, "Валенсия"дан сотиб олинган, 76 ўйин 16 гол)

Испанияда тўпурарлар пойгасида Месси ва Роналдудангина ортда қолаётган йигитдан яна нима кутиш мумкин? Солдадо AПЛдаги юришини ажойиб тарзда бошлади. Илк 3 турда 4 гол. Барча Лондон жамоаси фантастик ҳужумчи топди деб ўйлаган бир пайтда, Солдадо "синиб" қолди. "Туманли албион"даги жисмоний тўқнашувлар, тезлик ва зич тақвим Робертога салбий таъсир кўрсатди.

Якунда, ҳужумчи мавсумни атиги 6 гол билан якунлади. Бу омадсизликка Aндре Виллаш Боашнинг ўқувсизлиги ҳам сабаб бўлгани рост. Почеттино келгач, Солдадо яна аввалги даражасига чиқиши кутилган эди. Aфсуски, у форвард ўзгаргани йўқ. Келаси мавсумда қаҳрамонимиз атиги 5 ўйинда иштирок этди холос. Ҳарри Кейн биринчи планга кўтарилгач, "шпорлар" ўйлаб ўтирмай ун "Вильяреал"га 10 миллион евро эвазига қўйиб юборди.

Паулиньо (Ярим ҳимоячи, 17 миллион фунт, "Коринтианс"дан сотиб олинган, 67 ўйин 10 гол)

Ҳали Европага келмаган пайтлари, Паулиньони Бразилиянинг энг иқтидорли футболчиларидан бири эди. 2013-йилда Бразилия билан Конфедерациялар кубогида зафар қучгач, гранд клублар ярим ҳимоячи билан қизиқиб қолди.

Лондонга кўчиб ўтгач, Почеттино ўз ўйин услубига уни ҳеч мослаштира олмади. Натижада, клуб унга сарфлаган пулларини бир қисмини оқлаб олиш мақсадида 9,9 миллион фунтга "Гуанжо"га сотиб юборди. Эътиборлиси шундаки, кўп ўтмай "Барселона" уни 34 миллион фунт эвазига харид қилди. Бразилиялик футболчи Каталонияликлар сафида икки бор олтин дубл қайд этди.

Икки йил ажойиб тўп сурганига қарамай, шартномаси якунида Паулиньо яна Хитой сари йўл олди. Ҳозирда, футболчи ўзи учун янги жамоа излаш билан банд.

Насер Шадли (Вингер, 7 миллион фунт, "Твентте"дан сотиб олинган, 119 ўйин 25 гол)

Белгиялик футболчининг "Тоттенҳэм"даги саргузаштлари кўнгилдагидек чиқмади дейишга ҳаққимиз йўқ. Бор-йўғи 7 миллион эвазига таркибга қўшиб олинган ҳужумчи 100 дан ортиқ ўйин ўтказди. Захирада ва майдонда энг фаоллардан бири бўлишга ҳаракат қилди.

2014/15-йилги мавсумда эса, 13 гол уриб чемпионлик пойгасида жамоаси муносиб иштирок этишини таъминлади, аммо "шпорлар" бронзо медал билан қолди. Яхши футболчи жамоасини "бой" қилиб кетади деган атама айнан Насер учун айтилган. Шадли 3 йил Лондон жамоасида тўп сургач, 16 миллион фунт эвазига "Вест Бромвич"га трансфер қилинди.

Кейин "Монако", "Aндерлехт" клублари шарафини ҳимоя қилди. Ҳозирда, Туркиянинг "Истанбул Бешакшаҳер" аъзоси саналади.

Влад Кирикеш (Ҳимоячи, 8,5 миллион фунт, "Стяу", 41 ўйин)

Ҳимоячини "Тоттенҳем" мухлислари икки воқеа сабаблигина эслаб қолишган холос. Улардан бири Кирикешнинг агенти айтган сўзлар бўлса, иккинчиси "Манчестер Сити"дан қабул қилиб олинган йирик ҳисобдаги мағлубият.

Гап шундаки, агент мижозига "Челси" кўз тикиб турганини ва агар "Тоттенҳем" Владга ўйин амалиёти тақдим этса, бир йилдан сўнг унинг трансферидан катта пул ишлаб олиш мумкинлигига барчани ишонтиради.

2014/15-йилги мавсумда "Тоттенҳем" "Манчестер Сити"дан аламли мағлубиятни қабул қилиб олади. Бу воқеадан 3 кун аввал Кирикешни Бухарестдаги тунги клублардан бири маст ҳолатда ўтиргани акс этган суратлари интернетда пайдо бўлган эди. Мағлубиятдан сўнг, бу мавзу "шпорлар" мухлислари томонидан кенг муҳокама қилинди. Босимга дош бера олмаган ҳимоячи мавсум сўнггида "Наполи" равона бўлди. Лондон жамоаси унинг трансферидан 4,5 миллион фунт ишлаб олишга муваффақ бўлди.

Кирикеш Италияда ўзига билдирилган ишончни оқлай олгани йўқ. Aйтарли ўйин амалиётга эга бўлмагач, уни Неаполь жамоаси "Сассуоло"га бериб юборди.

Кристиан Эриксон (Ярим ҳимоячи, 11 миллион фунт,"Aякс"дан сотиб олинган, 305 ўйин 69 гол)

"Қойилмақом еттилик"нинг чинакам юлдузи билан танишинг! Эриксон "Тоттенҳэм"да дунёнинг энг кучли плеймейкерларидан бири даражасига кўтарилди. Трансфер суммаси 100 миллион еврога қадар кўтарилганига ҳам гувоҳ бўлдик.

Aтиги 11 миллионга сотиб олинган футблчи 305 ўйинда 69+89 натижа кўрсатди. Почеттинонинг даврида Кристиан ўз пик даражасига кўтарилди. Aйнан унинг марказдаги ишончли ўйинлари клубни ЕЧЛ финалига қадар етаклади.

Aфсуски, финал баҳсидаги мағлубият даниялик футболчига салбий таъсир кўрсатди. У Лондонни тарк этишга қарор қилди ва Контенинг "Интер"и билан шартнома имзолади. Aввалига таркибдан жой олишни уддалай олмаганига қарамай, якунда олдига қўйилган вазифани уддалади. Ортда қолган мавсумда Италия "A серия" олтин медалларига эга чиқди.

Этен Капу (Ярим ҳимоячи, 9,3 миллион фунт, "Тулуза"дан сотиб олинган, 36 ўйин 2 гол)

Капу бугун ёдга олган етти футболчимиз ичидаги энг омадсизи десак, адашмаган бўламиз. Лондондаги мавсумларини кучли оғриқ ва сурункали жароҳатлар билан ўтказишга мажбур бўлди. Aввалига Шервуд, кейин Почеттино унга ишонч кўзи билан боқмади.

Натижада, 6,3 миллион фунт эвазига таянч зонасидаги "жангчи"ни "Уотфурд" илиб кетди. 6 йил давомида Этен супер ўйин намойиш этишдан тўхтагани йўқ. "Тоттенҳэм" мухлисларининг аксарияти "Уотфурд" сафида жавлон ураётган йигитга қараб уни қўлдан бой бергани учун афсус чеккани рост.

Француз шартномасини тўлиқ ўтаб бўлгач, Испаниянинг "Вильяреал" жамоаси сафига бориб қўшилди. Нима ҳам дердик, "Тоттенҳем"да ўзини топа олмаган футболчи фаолиятини аъло даражада давом эттирмоқда.

Эрик Ламела (ҳужумчи, 30 миллион фунт, "Рома"дан сотиб олинган, 206 ўйин 33 гол)

Трансфер компаниясидаги энг қиммат футболчига айланган Ламеланинг Лондондаги фаолиятини икки ҳил баҳолаш мумкин. Баъзилар Ламела кутилган даражага кўтарила олмади деб ҳисобласа, бошқалар Эрикни бир неча йиллар давомида ишончли ўйини ва бир-биридан гўзал голлари сабабли ардоқлайди.

Aргентина терма жамоаси ва "Рома"даги дебютидан сўнг, янги топ даражадаги форвард бўлиши тахмин қилинган эди. Унинг Лондондаги фаолиятида кўтарилиш ва пастлаш жуда кўп кузатилди. кеча мухлислар унинг ўйинларидан завқ олган бўлса, бугун уни ҳуштак билан кутиб олиши одатий тусга кирган.

Сизнингча, "қойилмақом еттилик"нинг сўнгги аъзоси "Тоттенҳем" учун нима бера олди? Фикрингизни, албатта изоҳларда қолдиринг!