"Тўй қачон", "куёв жўра ким?" - Футбол майдонида футбол ҳақида сўз юритилиши керак

Абдуқодир Ҳусанов кеча машғулотлар аввалида берган интевьюсида айрим журналистлар асосан унинг шахсий ҳаётида ҳақида сўрашди. Тўғри,  футбол ҳақида ҳам етарлича саволлар бўлган. Бироқ айримларининг фокуси бошқа шахсий ва маиший мавзуларга йўналтирилган. Сўнгги кунларда терма жамоанинг йиғинларига қизиқиш жуда катта. Табиийки барча ОАВ буни ёритишни истайди. Аммо футболни тушунмайдиган "журналистлар" керакли саволларни беришни ўрнига бошқа ерларга "ўтлаб кетмоқдалар". 

Нега журналистларимиз Абдуқодирдан "Манчестер Сити"нинг ўйин услубига қандай мослашгани, Гвардиоланинг бошқа мураббийлардан қандай устун жиҳатлари борлиги, клубдаги ички муҳит, Чемпионлар лигасида "Реал"га қарши катта ўйин, "Челси" билан ўйинда йўл қўйган хатосидан кейин инглис мухлисларининг унга бўлган муносабати, Лига1 дан АПЛнинг фарқи, Гвардиола Абдуқодирга қандай кўрсатмалар бериши, бироз бўлсада аввалги агрессевлик йўқолиши, бу мураббийнинг кўрсатмасимиди, хуллас, яна шунга ўхшаш саволлар берилиши ўрнига  футболчидан тўйи қачон бўлиши, куёв жўра кимлиги ҳақида сўрашмоқда. Ҳусанов проффесионал футболчи, ундан футбол ҳақида сўраш керак. Балки шунда ўзини эркинроқ ҳис қилиб, саволларга батафсил жавоб берар.

Футболни чиндан тушунган, касбини ҳурмат қилган журналист фақат футбол ҳақида сўрайди. Қолган масалалар иккинчи даражали. Бу маҳалладаги чойхона эмас. Футбол майдонида футбол ҳақида гап юритилади. 


 

Муҳаммадқодир Рузматов