ЦСКА бош мураббийи илк тур олдидан "Андижон"га омад тилади

Бугун “Мавсум-2024” расман бошланади. Хабарингиз бор, 1-тур учрашувлари 1-4 март кунлари давомида ўтказилади. “Андижон” эса 3 март куни Олмалиқда ОКМКга қарши майдонга тушади.

Маълумки, қишки селекция жараёнида жамоа таркибида Москванинг ЦСКА клуби тарбияланувларидан икки нафари қўшиб олинган. Булар – дарвозабон Максим Сарраф ҳамда ҳужумчи Лука Згурский.

Туркиянинг Анталия шаҳридаги йиғин мобайнида "Андижон" айнан ЦСКАга қарши ўртоқлик ўйинини ўтказганини биласиз. Бунинг устига айнан Максим ҳамда Луканинг “Андижон” билан шартнома имзоланиши Россияда ва жумладан “армиячи”ларнинг ўзида ҳам ўзига хос тарзда қизиқишни уйғотган.

“Андижон” матбуот хизмати эса ЦСКА клуби бош мураббийи Владимир Федотов билан боғланди ва у юртимизда янги бошланаётган мавсум олдидан “Андижон” ҳамда икки нафар шогирди ҳақида ўз фикрлари билан ўртоқлашди.  

"Хайрли кун! Ҳа, биз ўзимизнинг тарбияланувчиларимизни доимий равишда кузатиб борамиз.

Максим Сарраф ва Лука Згурскийни ҳам кузатишда давом этамиз. Уларни янги жамоасида омадли дебют ўтказишларини истаяпмиз.

Шунингдек, “Андижон” клубига янги старт олаётган мавсумни ғалаба билан бошлашини ва юқори натижалар кўрсатишини тилаб қоламан. Омад”, - деди Владимир Валентинович, “Андижон” матбуот хизматига.

“Андижон” матбуот хизмати.