Турклар “Сити” юлдузини сўраяпти

Туркиянинг “Фенербаҳче” клуби ёзда “Манчестер Сити”ни тарк этадиган Бернарду Силвани ўз сафига қўшиб олиш учун ҳаракат бошлади.

31 ёшли португалиялик ярим ҳимоячи мавсум охирида жамоани тарк этиши ва шартномаси тугаши аниқлашган.

Манбаларга кўра, “Фенербаҳче” спорт директори Девин Ўзек ҳамда клуб раҳбарларидан бири Эртан Торуногуллари яқин кунларда Англияга бориб, футболчининг агенти Жорже Мендеш билан учрашади.

Истанбул клуби Бернардуга келаси мавсум учун таклиф тайёрламоқда.

Бироқ “Фенербаҳче”га жиддий рақобатчилар бор. Уларнинг асосий рақиби “Галатасарой” ҳам Силвага қизиқмоқда ва унга йилига 15 миллион евро маош таклиф қилишга тайёр.

Шунингдек, футболчига “Ювентус”, “Барселона” ва “Милан” каби  катта клублар ҳам эътибор қаратган.

Бернарду Силва 2017 йилдан бери “Манчестер Сити” сафида 454 та ўйин ўтказиб, 76 гол ва 77 ассист қайд этди. У клуб билан 19 та соврин ютиб, жумладан 6 марта Англия чемпиони ва бир марта Чемпионлар лигаси ғолиби бўлган.

Ҳозирча футболчининг кейинги манзили номаълум, аммо у ҳозир барча эътиборини мавсумни совринлар билан якунлашга қаратган.