Туркманистонга қарши биринчи ўйинни эслаб!

Бугун Ўзбекистон терма жамоаси жаҳон чемпионати 2-саралаши доирасида Туркманистонга қарши майдонга тушади. 

Туркманистонда бўлиб ўтган биринчи учрашув сунъий майдонда ўтказилган эди ва унда ҳамюртларимиз 3:1 ҳисобида ғалаба қозонган эди. 

Асосий таркиб қуйидагича эди:

Дарвозабон: Ўткир Юсупов;

Ҳимоячилар: Ҳожиакбар Алижонов, Ҳусниддин Алиқулов, Рустам Ашурматов, Абдуқуодир Ҳусанов, Фаррух Сайфиев;

Ярим ҳимоячилар: Одил Ҳамробеков, Отабек Шукуров;

Ҳужумчилар: Азизбек Турғунбоев, Остон Ўрунов, Элдор Шомуродов.

Биринчи бўлим якунида Туркманистон терма жамоасининг 4-рақамли футболчиси Мейлис Дурдиев дарвозамизнинг яқин бурчагини аниқ нишонга олиб ҳисобни очган.

Иккинчи бўлимда вакилларимз кетма-кет ҳужум уюштириши натижасида 57-дақиқада термамиз сардори Элдор Шомуродовнинг узатмасидан сўнг Отабек Шукуров ўйинда мувозанатни тиклаган, 77-дақиқада Шукуров дублни расмийлаштирганди.

Учрашув сўнгида Шукуровнинг супер пасидан кейин Шомуродов ҳам рақиб дарвозасини ишғол қилган - 1:3.

Эслатиб ўтамиз, бугунги учрашув соат 19:30да "Бунёдкор" стадионидан старт олади.