"Турон" бош мураббийи: Футболчиларимиз оғир юкламалардан кейин майдонга тушишди

Бугун сайтимиз орқали хабар берганимиздек, “Турон” ўртоқлик учрашуви доирасида “Андижон”ни 3:2 ҳисобида мағлубиятга учратди. Беллашувдан сўнг, “Турон” жамоаси бош мураббийи Ислом Исмоилов sports.uz учун таассуротларини билдирди.

- Дастлабки ўртоқлик учрашувини ташкил этдик. Қишки йиғинни бошлаганимизга 7-8 кун бўлди. Тайёргарлигимизнинг биринчи босқичида футболчиларнинг жисмоний ҳолатини яхшилашга эътибор қаратилади. “Андижон” билан учрашувни футболчиларимиз оғир юкламалардан кейин ўтказишди. Шунинг учун барча ўйинчиларимизда чарчоқ аломатлари бор эди. Биринчи учрашувданоқ, йигитлардан кўп нарсани талаб қилишнинг иложи йўқ. Нима бўлса ҳам жамоамиз ғалаба қозонганидан хурсандман. Шу руҳда давом этамиз. Албатта, камчиликларимизни тўғрилаб, ўйин сифатимизни янада яхшилашга эътиборни оширамиз. Ўйинда кўплаб янги футболчилар майдонга туширилди. Уларнинг ўзаро тил топишишлари учун ҳам вақт керак бўлади.

“Андижон”да ҳақида? Уларда ўтган йилги таркибидан айрим ўйинчилар тўп сурди. Қолаверса, бир қанча ёшлар ҳаракат қилди. Лекин ҳозирдан жамоалар ҳақида бир нарса дейиш қийин. Боз устига рақиб тўғрисида фикр билдира олмайман, чунки ўз мураббийлари бор.