У Европанинг энг зўр вундеркиндларидан

Бундеслига етакчиси “Бавария” немис футболининг ёрқин келажаги сифатида эътироф этилаётган Флориан Виртцни трансфер қилишни режалаштирмоқда.

Айни пайтда “Байер” шарафини ҳимоя қилаётган 18 ёшли вундеркинднинг Европада харидори кўп. Мюнхенликлар эса бу ўйинчини Бундеслигада олиб қолишга интилмоқда.

Bild нашрининг ёзишича, “Бавария” мутасаддилари Виртцнинг оиласидагилар билан учрашиб, ярим ҳимоячининг бўлажак трансферини муҳокама қилган.

Флорианнинг леверкузенликлар билан амалдаги шартномаси 2026 йилнинг ярмигача имзоланган. Унинг трансфери учун “Бавария” 70 миллион евро атрофида харажат қилишига тўғри келади.

Флориан Виртц жорий мавсумда Бундеслигида 18 та учрашувда бешта гол уриб, тўққизта голли пас оширди.