Уч гранд 19 ёшли “Гигант” учун курашмоқда

Англия Премьер-лигаси вакили “Борнмут”нинг истеъдодли ҳимоячиси учун кураш бошланди. Жамоанинг 19 ёшли марказий ҳимоячиси Дин Хейсен гранд клублар нишонига тушди. 

TEAMtalk нашрининг маълум қилишича, бўйича 195 сантиметрни ташкил қилаётган “баҳайбат” футболчини “Челси”, “Манчестер Юнайтед” ва “Пари Сен-Жермен” талашяпти. 
“Борнмут” ўз ўйинчисини 50 миллион фунтга баҳолаётгани айтилмоқда. Мутахассислар Дин Хейсеннинг устун томонлари сифатида ҳимоячининг ҳужум қилиш қобилиятини эътироф этмоқда. Дин вазият тақозо этган паллада тезда олдинги чизиқда пайдо бўлади. 

Бундан ташқари, испаниялик иқтидорли ўйинчи тўпни ўз жарима майдончасидан узоқлаштириш, рақибнинг юқоридан келаётган пасларини кесиб қўйиш, тўпни эгаллаб олишга уста экани айтилмоқда. 

Дин Хейсен аслида “Ювентус” тарбияланувчиси ҳисобланади. Туринликлар жамоасидан ташқари, ўтган йили ярим мавсум “Рома”да ҳам тўп тепди. 

“Борнмут” ўтган ёз бу ўйинчини 15,2 миллион еврога трансфер қилганди. Энди бу клубда харажатларни бир неча баравар ортиғи билан қоплаш имконияти юзага келди.