Учинчи уриниш! “Сити”дан футболчи олмасак бўлмайди!

Лондон клуби бу борада “Манчестер Сити”да асосий таркибга киришга қийналаётган Савиони олиш ғоясига қайтди. “Шпорлар” ёзги трансферлар даврида бразилиялик футболчи учун икки марта таклиф юборган эди. Бироқ “шаҳарликлар” 21 ёшли иқтидор эгасини сотиб юборишни истамаганди.

Англия Премьер-лигасида юқори ўринлар учун курашишни уддалай олмаётган “Тоттенхэм” таркибини кучайтиришга эътибор қаратадиган бўляпти.

Энди вазият ўзгарди. Таниқли журналист Дэвид Орнштейннинг маълум қилишича, “Манчестер Сити” раҳбарияти мавсумнинг биринчи қисмида ўзини кўрсата олмаган Савио билан хайрлашишга тайёр.

“Тоттенхэм” эса, ҳужумкор футболчини олиш учун учинчи уринишни амалга оширишга тайёргарлик кўрмоқда. Аслида “Тоттенхэм” ҳужумкор футболчи позициясига “Борнмут”дан Антуан Семеньони олиб келмоқчи эди.

Бироқ ганалик тўпурарга АПЛнинг энг қудратли клублари, хусусан, “Манчестер Сити” ҳам даъвогарлик қилаётгани боис, “шпорлар” ўйинчига эгалик қилувчи “Борнмут”ни трансферга кўндира олмади.

Кейин лондонликлар бор эътиборини жорий мавсумда 13 марта майдонга тушган ва битта гол урган Савиога қаратадиган бўлди.