Учта юлдуз йиғинда иштирок этмайди: Ираола "Ливерпуль"даги вазият ҳақида гапирди

«Ливерпуль»нинг янги бош мураббийи Андони Ираола жамоадаги жароҳат олган футболчилар ҳолати ва жаҳон чемпионатида ўйнаган ўйинчиларнинг сафига қачон қўшилиши ҳақида маълумот берди. Ҳозирча жамоа АҚШда йиғин ўтказмоқда.

Ираола таъкидлашича, «қизиллар» таркибида бир қатор футболчилар ҳамон оғир жароҳатлардан кейин тикланиш жараёнида.

- Сафимизда жуда жиддий жароҳат олган ўйинчилар бор, уларга тўлиқ тикланиш учун вақт керак. Стефан Байчетич ва Ватару Эндо жамоа билан умумий машғулотларга қайтиш арафасида, улар аввал қисман шуғуллана бошлашади, — дея Ираоланинг сўзларини келтиради Liverpool Echo.

Мураббийга кўра, қолган жароҳат олган футболчилар орасида биринчи бўлиб майдонга қайтиши кутилган ўйинчи Жованни Леонидир. Ундан сўнг Конор Брэдли ва Уго Экитике сафга қўшилиши режалаштирилган.

- Энг яқин қайтиши кутилаётгани — Леони. Ундан кейин Конор ва Уго. Улар бўйича тахминий муддат — икки ой атрофида, — деб қўшимча қилди Ираола.

Унинг айтишича, яқинда жаҳон чемпионатида иштирокини якунлаган айрим футболчилар жамоага бироз кечроқ қўшилади.

- Биз яқинда жаҳон чемпионатида ўйнаб қайтган бир неча футболчига дам олиш учун кўпроқ вақт беришга қарор қилдик. Албатта, улар биз билан машғулотларни қанчалик эрта бошлашса, талабларимизни шунчалик тезроқ англаб етишади, — деди Ираола.

Алиссон, Коди Гакпо ва Виржил ван Дейк Ливерпулдаги машғулот базасида алоҳида тартибда тайёргарлик олиб боради.

- Виржил ўтган мавсумда Европадаги футболчилар орасида энг кўп дақиқа майдонда қолганлардан бири бўлди. Шу боис унинг бу ерга келмасдан, Ливерпулда иш бошлаши мантиқан тўғри қарор, — дея изоҳ берди бош мураббий.

Эслатиб ўтамиз, Андони Ираола июнь ойида лавозимга тайинланган эди. У ишдан бўшатилган Арне Слот ўрнини эгаллади.