УЕФА ФИФАни танқид қилди: "Футбол ҳеч биримизга тегишли эмас. ФИФА уни сотиш ҳуқуқига эга эмас"

Европа футбол ассоциациялари иттифоқи (УЕФА) оммавий ахборот воситаларида тарқалаётган, Халқаро футбол федерацияси (ФИФА) ташкилотнинг тижорат ҳуқуқларининг бир қисмини сотишга тайёрланаётгани ҳақидаги хабарлардан жиддий хавотир билдирди.

Маълумотларга кўра, ФИФА хусусий инвесторларга янги ташкил этиладиган тузилманинг тахминан 20 фоиз улушини таклиф қилмоқчи. Ушбу янги тузилмага ФИФАнинг медиа ва тижорат ҳуқуқлари ўтказилиши режалаштирилган.

УЕФАнинг фикрича, футболга оид ҳуқуқларни сотиш футбол бошқаруви тамойилларига зид келади ва бутун жараённи шаффофликдан маҳрум этади.

УЕФА ўзининг X ижтимоий тармоғидаги саҳифасида баёнот эълон қилиб, унда ФИФАнинг тижорат ҳуқуқларининг бир қисмини сотиш нияти ҳақидаги ОАВ хабарларидан ташвишда эканини маълум қилди.

Сешанба куни Bloomberg, The Times каби бир қатор нашрлар ФИФА хусусий инвесторларга тахминан 20 фоиз акцияни сотишни режалаштираётгани, бу акциялар эса ташкилотнинг медиа ва тижорат ҳуқуқларини ўз ичига оладиган янги тузилмага тегишли бўлиши ҳақида ёзган эди.

"Бу футболни бошқарувчи институтлар ҳеч қачон кесиб ўтмаслиги керак бўлган чизиқдан ўтишдир. УЕФА бу масалага ниҳоятда жиддий қарайди. Худди шундай муносабатни барча миллий футбол ассоциациялари ҳам намоён этиши лозим. Шунингдек, барча манфаатдор томонлар – лигалар, клублар, футболчилар, мухлислар, ҳукуматлар ва ўйин келажагига бефарқ бўлмаган ҳар бир киши бу ҳолатга жиддий эътибор қаратиши керак.

Футболнинг руҳи ва бошқарув тизими – бу сотиладиган товар эмас, айниқса, бу жараёндан ким молиявий фойда кўраётгани мутлақо очиқ эмас бир пайтда. Футбол ҳеч биримизга тегишли эмас. ФИФА уни сотиш ҳуқуқига эга эмас", – дейилади УЕФА баёнотида.