УЕФА "Реал", "Боруссия Д" ва "Лацио" мухлисларини ранжитиши мумкин

УЕФА 17 март куни коронавирус COVID-19 сабаб тўхтатиб қўйилган чемпионатлар тақдирини ҳал қилиш бўйича йиғилиш ўтказади. Бу ҳақда AS нашри хабар тарқатмоқда.

Унга кўра, агар чемпионатлар давом эттирилмаса, у ҳолда ҳозирги пайтда жадвалда етакчилик қилаётган жамоалар чемпион сифатида эътироф этилади.

Собиқ Югославияда 1999 йил “Партизан” клуби мамлакатда уруш бошлангани сабаб шу тариқа чемпион бўлган эди.

Таъкидлаш керакки, айни дамда Европанинг топ-10 чемпионатларида қуйидаги жамоалар етакчилик қилишмоқда:

"Барселона" (Испания), "Ливерпуль" (Англия), "Бавария" (Германия), "Ювентус" (Италия), ПСЖ (Франция), "Порту" (Португалия), "Зенит" (Россия), "Брюгге" (Бельгия), "Аякс" (Нидерландия) ва "Шахтёр" (Украина).