Улар орасида Ҳусанов ҳам бор! “Барселона” манчестерликлар трансферларига муносабат билдирди
“Манчестер Сити” қишки трансферлар даврида энг катта харидларни амалга оширган клуб сифатида кўпчиликнинг эътиборини тортди.
Мавсумнинг биринчи ярмидаги инқироздан кейин Хосеп Гвардиола таркибда жиддий ўзгаришлар қилишга киришди.
Январда “шаҳарликлар” катта харажат қилиб, “Ланс”дан Абдуқодир Ҳусановни, “Палмейрас”дан Виктор Рейсни, “Антрахт”дан тўпурар ҳужумчи Умар Мармушни, “Порту”дан Нико Гонсалесни трансфер қилди.
Бу футболчиларнинг бари Хосе Гвардиола қўл остида турли даражадаги учрашувларда дебютини ўтказиб бўлгани жамоанинг уларга ишончи катта эканидан далолат беради.
Халқаро футбол уюшмалари федерацияси – ФИФА қишки трансферлар даврида январь ойида футбол клублари жами 5863 та трансферни расмийлаштиршанини, савдоларнинг умумий қиймати 2,35 миллиард АҚШ долларини ташкил қилганини ва бу кўрсаткич янги рекорд эканини эълон қилди.
Январь ойида энг кўп харажат қилганлари Англия клублари бўлди. Замонавий футбол ватанидаги клублар янги ўйинчилар учун 621,6 миллион доллар миқдорида маблағ сарфлади. Мана шу умумий суммадан қарийб учдан бирини “Манчестер Сити” сарфлади.
Трансфер бозорида Испания чемпионати вакиллари суст ҳаракат қилди. Хусусан, январда энг кўп харажат қилган лигалар рейтингида Ла Лига кўринмади. Англия, Германия, Италия, Франциядан кейинги ўринга Саудия Арабистони кўтарилди.
“Барселона” спорт директори Деку каталонияликларнинг трансфер бозорига кирмаганини танқид қилаётган футбол жамоатчилиги вазият бўйича изоҳ берди. Бу мутахассис ўз муносабатида “Барселона”ни Англиянинг амалдаги чемпиони “Манчестер Сити”га таққослади.
- Бугунги кунда тўрт-беш нафар янги ўйинчи олиб келишимизга эҳтиёж йўқ. Биз ҳозир ҳам бахтиёрмиз, чунки аввалгидек янги футболчилар трансфери билан боғлиқ бош оғриғимиз йўқ.
Масалан, “Манчестер Сити” тўрт нафар янги ижрочини олиш учун 200 миллион евродан ортиқ маблағ сарфлади. Биз эса, бунақа катта харажатлар қилишга қодир эмасмиз, - деди Деку.
Таъкидлаш жоизки, “Барселона” бир неча йил давомида молиявий инқирозни бошдан кечирди. Бу каталонияликларнинг трансфер сиёсатига таъсир қилди. Хусусан, Деку ёзда катта умидлар билан жамоага олиб келинган Даниэль Ольмони Ла Лига қайдномасидан ўтказишда жуда катта қийинчиликларга дуч келди.
Бу муаммолар “Барселона”нинг молиявий аҳволидан келиб чиқди ва клуб раҳбариятини қисқа фурсатда маблағ билан боғлиқ масалаларни ечишга мажбур қилди.
Бугунги кунда ҳам Испания футболи байроқдорларидан ҳисобланган “Барселона” молиявий барқарорлик ва трансферларни амалга ошириш борасида нафақат ашаддий рақиби “Реал”, балки Европанинг бошқа гранд клублари билан ҳам рақобатлашишга қийналаётгани бор гап.
Ғалати дуэл: Шомуродов ёки Довбик?
Шомуродовни машҳур клуб олмоқчи!
Шомуродовга кутилмаган янги харидор чиқди, лекин...
Жаҳон чемпиони Ҳусановга қандай баҳо берди?
Фикрлар