Ulug‘bek Baqoev: "Balki hisob ochilmagani muxlislarga yoqmagandir, lekin..."

“Buxoro” klubi O‘zbekiston Kubogining “F” guruhida ikkita turdan keyin 4 ochko bilan peshqadam bo‘lib turibdi. “Mash’al”da ham 4 ochko bor, biroq to‘plar nisbati buxoroliklarda yaxshiroq.

Kuni kecha ushbu klublar Muborakda Kubok doirasida bellashishdi va unda hisob ochilgani yo‘q. Keyingi turda esa “Buxoro” OKMK bilan bellashadi. Buxoroliklar ustozi Ulug‘bek Baqoev esa “Mash’al”ga qarshi o‘yin va bo‘lajak bahs oldidan o‘z fikrlarini aytib o‘tdi.

- “Mash’al”ni kuchli va kurashuvchan jamoa sifatida yaxshi bilamiz. Bu safar ham shu narsa yana o‘z isbotini topdi. Ayniqsa, yana 0:0 o‘ynaganimiz fikrimni tasdiqlab turibdi. Balki hisob ochilmagani muxlislarga u qadar yoqmagandir. Lekin kurashuvchan, hujumlarga boy o‘yin bo‘ldi. Buning uchun futbolchilarimizga minnatdorchiligimni bildiraman. Endi keyingi uchrashuvga yaxshiroq tayyorgarlik ko‘ramiz. Ko‘rdinglar, o‘yin boshida bizda bir qator jarohatlar bo‘ldi. Albatta, bunday jarohatlar yuz berishini kutmagandik. Shunday bo‘lsa-da, biz yaxshi jamoa bilan durang o‘ynadik.

- Denisov bilan Musaevni jarohatlari bormidi yoki...

- Ularning ikkalasida ham jarohat bor edi. Hozirda umumiy mashg‘ulotlarda qatnashishyapti. Yaqin kunlardagi o‘yinlarda ularni maydonda ko‘rishimiz mumkin.

- Bu o‘yin OKMK bilan uchrashuv uchun tayyorgarlik vazifasini o‘taydimi?

- Birinchi navbatda aytishim kerakki, turnir jadvali qanday holatdaligini bilardik. Biz bu uchrashuvda ham natija va sifatli o‘yin ko‘rsatish uchun maydonga tushgandik. Imkon qadar yaxshi o‘yin va natija qayd etishga harakat qildik. Hattoki, bellashuv boshida biz hisobni ochishimiz ham mumkin edi. Ha, “Mash’al”da ham vaziyatlar bo‘ldi va ular ham gol urishga yaqin edilar. Lekin to‘p darvozaga kirmadi va uchrashuv 0:0 bilan qoldi. Lekin bu natija bizni qoniqtirmadi. “Mash’al”ning keyingi raqibi birinchi liga jamoasidir. Shuning uchun ularda keyingi bosqichga chiqish uchun imkoniyat bor. Bizga esa keyingi bellashuvda nisbatan yana qiyin bo‘ladi. Superliga jamoasiga qarshi maydonga tushamiz. Oldimizga qo‘yilgan vazifani bajarishga harakat qilamiz.

- “Mash’al” bilan “Buxoro” ikkita o‘yin o‘tkazdi va ikkalasida ham hisob ochilmadi. Ayting-chi, “Mash’al” “Buxoro” uchun noqulay raqibmi?

- (Kuladi) Ikki bir xil o‘xshash jamoa deb o‘ylayman. Ikkalasida ham tajribali o‘yinchilar bor. “Mash’al”ga ham, “Buxoro”ga ham foydali. Ayniqsa, yoshlarga tajriba orttirish uchun juda yaxshi. Bunday uchrashuvlar yoshlar uchun katta tajriba orttirish vazifasini o‘tab beradi. Superligaga chiqishni maqsad qilgan jamoa uchun bu juda foydali, deb o‘ylayman. Oldimizda yana uchrashuvlar bor. Umid qilamanki, natijalarimizni yana yaxshilab boramiz.

- O‘zbekiston U23 terma jamoasining Osiyo Kubogidagi ishtiroki haqida nimalarni aytgan bo‘lardingiz?

- Birinchi navbatda olimpiya terma jamoamizni Olimpiadaga yo‘llanmani qo‘lga kiritishini juda ham xohlayman. Bu butun o‘zbek xalqiga bayram tuhfasi bo‘ladi. Keyingi avlod va yoshlarimiz uchun motivatsiya va tarix yaratilgan bo‘ladi. Yurtimizdagi barcha terma jamoamizga muxlislik qilyapti va qo‘llab-quvvatlashyapti. Musobaqa g‘olibi bo‘lib Olimpiadaga chiqishini barcha istayapti. Bu yo‘lda ularga omad va qilayotgan ezgu maqsadlari amalga oshishini tilab qolaman. Shuningdek, yigitlarimizga jarohatlarsiz, O‘zbekistonga qahramon sifatida qaytib kelishlarini xohlayman.