Унинг “Рома”да қолиши қийин

“Рома” майдон марказини кучайтириш мақсадида кейинчалик сотиб олиш ҳуқуқи билан икки нафар ярим ҳимоячини ижарага олган эди.

Улардан бири Эйнсли Мейтленд-Найлснинг ўйини Жозе Моуриньога маъқул келмади ва англиялик футболчи “Арсенал”га қайтиб кетди.

“Порту”дан олинган Сержиу Оливейра жамоага яхши киришиб кетди. Бош мураббий ўз ҳамюртини жамоасида олиб қолишга тайёр. Бироқ, спорт директори Тьягу Пинто бунинг учун “Порту”ни римликларга мақбул нархга кўндириши керак.

Келишувда римликлар Оливейранинг трансфер ҳуқуқини сотиб олишни истаса, 13 миллион евро тўлаши белгилаб қўйилган эди. Бироқ, “бўрилар” тажрибали футболчига шу сумманинг ярмини тикмоқчи бўляпти. Чунки Оливейранинг бор-йўқлиги жамоага у қадар сезилмайди.

Агар “Рома” ўзи кўзлаган 6-7 миллион еврога “Порту”ни кўндира олмаса, Сержиу ҳам келган жойига қайтиб кетади.