Вальверде "Манчестер Сити" дарвозасига хет-трик қайд этганидан сўнг нималар деди?

УЕФА Чемпионлар лигасининг 1/8 финал доирасида "Реал Мадрид" ўз уйида "Манчестер Сити"ни қабул қилди ва 3:0 ҳисобида ғалаба қозонди. Эътиборлиси, мазкур баҳсда мадридликлар футболчиси Федерико Вальверде хет-трик қайд этиб, ўйин тақдирини ҳал қилди. Шундан сўнг у ўз фикрлари билан ўртоқлашди.

"Бу ақлбовар қилмас кеча бўлди, бундай ўйинларни ҳар доим орзу қиласан. Менга ишонч бағишлаган жамоадошларимга раҳмат айтмоқчиман. Шунингдек, мураббийлар штаби ва қийин мавсумга қарамай бизни қўллаб-қувватлаётган барча мухлисларга миннатдорчилик билдираман.

Ҳа, бу аниқ менинг энг яхши ўйиним бўлди, айниқса голлар жиҳатидан. Бугун мен ўйиндан катта завқ олдим, анча вақтдан бери бундай ҳис қилмагандим. Мен хурсандман, лекин энг муҳими — жамоа ғалаба қозонди.

Мен ҳужумга кўпроқ қўшилишга ҳаракат қиламан, мураббий ҳам шуни сўрайди. Бугун тўпни назорат қиладиган футболчилар кўп эди, шунинг учун олдинга чиқишга ҳаракат қилдим. Жамоадошларим жуда яхши паслар беришди.

Биз рақибнинг дарвоза тепишларида шахсий прессинг қилишини кўп ўргандик. Ҳужумда тез ҳаракат қилиб, бундан фойдаландик. Биз бир-биримизга ака-укадек муносабатда бўлишимиз керак. Агар бир бутун бўлиб ҳаракат қилсак, катта натижаларга эриша оламиз.

Манчестерда ўйнаш доим қийин. "Сити" мухлислари жуда иштиёқли. Жавоб ўйинига ҳисоб 0:0 бўлгандек тайёргарлик кўришимиз керак", — деди "Реал" ярим ҳимоячиси.