Виктор Кумиков : "Доим ҳам ғалаба қозона олмайсан"

“Андижон” ҳамда “Бухоро” (0:0) клублари иштирокидаги ўйиндан кейин одатга кўра матбуот анжумани ўтказилди. Жамоамиз устози Виктор Кумиков журналистларнинг саволларига жавоб қайтарди.

- Ўйин ҳақида нима дейсиз?

- Ўйин яхши бўлди. Учрашувдаги ягона муаммо шундан иборат бўлдики, биз гол ура олмадик. Бизда яхши имкониятлар бўлди. Лекин тўп дарвозага кирмади. Биргина Фарҳод Соҳибжоновнинг ўзи учта гол уриши мумкин эди. Ҳа, шундай, доим ҳам гол ура олмайсан ва доим ҳам ғалаба қозона олмайсан. Хавотирли жойи йўқ. Яхши ўйин кўрсатдик. Ўйлайманки, бир очко ҳам ёмон натижа эмас. Албатта, ғалаба қозонишни хоҳлаган эдик. Афсуски, ўхшамади. Кейинги ўйинга яхши тайёргарлик кўрамиз.

- Доимгидек, охирги дақиқаларда гол уришни хоҳлагандик. Бу сафар ўхшамади. Нима бўлди?

- Нима ҳам бўларди, гол уролмадик. Вазиятлар бўлди, аммо фойдалана олмадик. Шаҳбоз Эркиновда ҳам имкониятлар бор эди. Омад ҳам рақиб томонида бўлди.

- Натижадан қониқдингизми?

- Ютишни хоҳлагандик. Аммо охирги дақиқада бундан ҳам ёмони бўлиши мумкин эди. Умумий маънода айтганда, бир очко ҳам ёмон эмас. Бу сафар ютмадик, аммо кейинги сафар албатта ғалаба қозонамиз. Ҳозир футболни ҳамма яхши ўйнаяпти. Шу сабабли уч очкони олиш осон эмас, мушкул вазифага айланиб қолган.

- Охирги дақиқаларда ўйинчиларда чарчоқ аломатлари кузатилди. Нима сабабдан алмаштирмадингиз?

- Сиз ишонасизми, агар мен ўйинчи алмаштирсам вазият яхшиланишига?! Мабодо, ҳисоб бошқачароқ бўлганида алмаштирсак бўларди. Лекин у пайтда вазият қалтис эди. Мен доим таъкидлайман, ҳисоб 0:0 бўлиб турган маҳалда ёшларни майдонга тушириш қийинроқ. Аниқки, ёшлар бундай вазиятларда хато қилиши мумкин. Ёши катта футболчилар эса бундай вазиятларда қандай йўл тутишни яхши билишади.

“Андижон” матбуот хизмати.