Виктор Кумиков "Андижон"нинг дастлабки ғалабаси ҳақида қандай муносабат билдирди?

“Андижон” клуби ўз майдонидаги очилиш учрашувида “Янгиер-Қурувчи” устидан 2:0 ҳисобида ғалаба қозониб мухлисларини хурсанд қилди. Ўйиндан кейин ташкил этилган матбуот анжуманининг иккинчи қисмида мезбонлар бош мураббийи Виктор Кумиков журналистларнинг саволларига жавоб қайтарди.

- Бугунги ўйинни қийин ўтишини билардик ва кутилганидек шундай ҳам бўлди. Биринчи турларданоқ жанговар ўйинни кўрсатишимиз керак. Об-ҳаво сабабли майдон ҳолати ҳам яхши эмас. Қийин ўйин бўлди, аммо имкониятлардан фойдаланиб қолдик. Ҳимояда эса ишончли ҳаракат қилдик. Албатта, ҳужумда ҳам яна бошқа вазиятларга эга бўлдик. Аммо ҳаммасини ҳам голга айлантира олмадик. Энг асосийси, натижага эришдик. Футболда натижа муҳим, - дейди Кумиков.

- Шаҳбоз Эркинов нима учун майдонга туширилмади?

- Бунинг сабаби унда кичик жароҳати бор эди. Кеча асосий таркиб билан шуғулланди. Унгача икки кун биз билан машғулотларда қатнаша олмади.

- Про лига билан Суперлига ўртасида қандай фарқ бор?

- Мен учун фарқи йўқ. Ўйинчилар айнан про лигага яраша таклиф этилган. Суперлигада эса шунга яраша футболчилар. Масалан, бугунги ўйинда тўп сурган Анваров ҳатто биринчи лигада ҳам ўйнамаган. Биз эса мана шундай ёшларнинг ёнига тажрибали легионерларни жалб қилганмиз. Биз шу таркиб билан олдимизга қўйилган вазифани бажаришга ҳаракат қиламиз. Албатта, Суперлиганинг ўйин тезлиги бошқа, про лигада эса бошқачароқ ва шунга яраша таркиб танланган.

- Биринчи бўлимнинг 40-дақиқасигача “Андижон” бир-иккита вазият яратди холос. Жамоага ҳужумчилар етишмайдими?

- Ҳужумчимиз битта имкониятдан фойдаланди, ҳали мавсум узоқ. Биз яна яхши натижа кўрсатишга ҳаракат қиламиз. Ўтган сафар ҳам, бугун ҳам очилиш ўйинини ўтказдик. Бизга қарши ўйнаётган клубларнинг олдида Суперлигага чиқиш мақсади йўқ. Шунинг учун улар эркин, ўзлари хоҳлагандек ўйнашяпти, босим йўқ. Бугунги учрашувда илгари “Андижон”да ўйнаб кетган футболчилар ўзини кўрсатишга ҳаракат қилишди. Нимага деганда, ўшалар ҳам “Андижон” таркибига киришни хоҳлашган. Биз дарвозамиздан гол ўтказмадик. Бундан кейин ҳам яна яхши натижалар кўрсатамиз.

- Богдан Миличнинг ўйинидан қониқдингизми?

- У вазифасини бажаряпти, гол урди. Яна кўрамиз, мавсум ҳали узоқ давом этади. Майдонда хавфли вазиятларни яратяпти. Иккинчи қаватда тўпларни ҳам ютяпти. Муҳими, ўз ишини бажаряпти.