Viktor Kumikov: "Olimpik" kuchli beshtalikka kira oladi"

Viktor Kumikov bosh murabbiyligidagi Qozog‘istonning “Qaysar” jamoasi Turkiyadagi yig‘ini mobaynida ikkita nazorat uchrashuvini o‘tkazdi.

Avvaliga Italiyaning “Sampdoriya” klubiga qarshi bahsda “Qaysar” 0:3 hisobida yutqazgan bo‘lsa, ikkinchi bahsda Timur Kapadze ustozlik qilayotgan “Olimpik” jamoasiga 1:2 hisobida mag‘lub bo‘lishdi.

Viktor Kumikov ushbu uchrashuvdan keyin Sports.uz sayti uchun quyidagilarni aytdi:

“Biz Turkiyadagi ilk yig‘inimizda 2 ta o‘rtoqlik uchrashuvi rejalashtirgandik. Dastlabkisini “Sampdoriya”ga qarshi o‘tkazdik va 0:3 natijasida o‘yinni boy berdik. Ikkinchi o‘yinimiz “Olimpik” bilan kechdi. Unda 1:2 hisobida engildik. “Olimpik” darvozasiga golni jamoamiz safida ko‘rikdan o‘tayotgan o‘yinchi urdi.

“Olimpik” klubi chakki emas. O‘ylaymanki, ular chempionatda bemalol kuchli beshtalik uchun kurasha oladi.

Tarkibimizda ko‘rikdan o‘tayotgan futbolchilar bor. Hali hech biri bilan kelishuvga erishganimiz yo‘q”, - dedi Kumikov.