Viktor Kumikovning Qozog‘istondagi hayoti boshlandi yoxud "Qaysar"ni ham "Andijon"dagi kabi standartlar ustasiga aylantirmoqchi...mi?

Saytimiz orqali xabar berganimizdek, Viktor Kumikov kecha Qozog‘istonning Qizil-O‘rda shahriga etib keldi. “Qaysar” klubidan tushgan taklif yuzasidan muzokaralarning oxirgi bosqichi bo‘lib o‘tdi va yakunda ikki tomon kelishuvga erishdi.

Bugun Viktor Kumikov “Qaysar” klubi bosh murabbiyi sifatida rasman tanishtirildi. Qozog‘iston OAV esa bu borada bong urmoqda, desak ham bo‘ladi. Uning yana Qozog‘istonga qaytishini ijobiy baholamoqdalar. Chunki Viktor Balyutovich ular uchun aslo begona emas. Ta’bir joiz bo‘lsa, murabbiylik faoliyatining katta qismini qo‘shni chempionatda o‘tkazgan. “Esil”, “Elimay”, “Qaysar”, “Shaxtyor”, “Ordabasi” va “Atirau” kabi jamoalarni boshqargan. Ayniqsa, Kumikovning yorqin faoliyati “Shaxtyor” bilan bog‘liq. Qarag‘anda jamoasi bilan Qozog‘iston chempionatida qator sovrinlarni yutgan va evrokuboklarda ham ancha qiziqarli va dadil qatnashgan. Shu bois Kumikov Qozog‘istonning eng yaxshi murabbiyi nominatsiyasida ham g‘olib chiqqan. Qozoq OAV uning yana qaytishi haqida yozishayotganda, o‘z-o‘zidan “Shaxtyor” klubida amalga oshirgan natijalarini bot-bot tilga olib o‘tmoqdalar. Tabiiyki, "Andijon"dagi natijasi qozoqlarni ham bee’tibor qoldirmagani shubhasiz.

Qolaversa, Kumikovning bu “Qaysar”ga ilk tashrifi emas. 2003 va 2004 yilgi mavsumlarda ham rossiyalik mutaxassis mazkur jamoaga bosh murabbiylik qilgan. Oradan deyarli 20 yil o‘tib Viktor Balyutovich yana sobiq klubiga qaytdi. Uni oldiga jiddiy vazifalar qo‘yildi. “Qaysar” quyi divizionda 2-o‘rinni egallab elitaga qaytishga erishdi. Kuchlilar orasida jamoa mavqeini mustahkamlash, yuqori o‘rinlar uchun kurashish va Kubok bahslarida ham muvaffaqiyatli ishtirok etish kabi muhim maqsadlar turibdi. Bu borada “Qaysar” rahbariyati rossiyalik murabbiyga to‘la-to‘kis ishonch bildirishdi. Buning uchun unga barcha sharoitlar yaratib berilayotgani ma’lum bo‘lmoqda. Jumladan, 14 dekabr kuni Kumikov va “Qaysar” dastlabki yig‘in sifatida Turkiyaga jo‘nab ketmoqda va u erda yangi yil bayramigacha o‘quv-mashg‘ulot yig‘ini o‘tkaziladi. Ha, aytgancha, Viktor Balyutovichga "Qaysar"da "Andijon"da ham yaqindan ko‘maklashgan hamyurti Oleg Kornienko yordamlashadi.

Viktor Kumikovning oxirgi klubi – “Andijon” bo‘lganini yaxshi bilasiz. 2021 yil o‘rtalarida jamoa boshqaruvini o‘z qo‘liga olgan murabbiy jamoasi bilan omadsizlik sababli Superligani tark etgandi. Ammo rahbariyat unga pro ligada yana ishonch bildirishdi. Natijada rossiyalik mutaxassis “Andijon”ni Superligaga qaytarib oldidagi qarzni uzdi. Klub mutasaddilari mazkur murabbiy bilan yangi mavsumda ham hamkorlik qilish niyatida ekanliklarini ma’lum qilishgandi. Biroq shartnoma muddati tugagani va “Qaysar”dan tushgan taklif sababli Viktor Kumikov Qozog‘istonda ishlashni ma’qul topdi. Shunga qaramay, andijonlik ishqibozlar undan minnatdorlar.

Darvoqe, Kumikov pro liganing eng yaxshi murabbiyi nomiga ham sazovor bo‘lganini bilsangiz kerak. Mutaxassisning “Andijon”dagi faoliyati qiziqarli kechdi. Ayniqsa, pro ligada uning amalga tatbiq eta olgan uslubi qanchalik samara keltirganini natijalarda ko‘rishingiz mumkin va futbol jamoatchiligi vakillari “Andijon” va Kumikov borasida juda iliq fikrlarni aytishdan charchashmadi. Bunga uning qo‘llagan uslubi sabab. Standartlar qiroliga aylanib olgandi, desak mubolag‘a qilmagan bo‘lamiz. Kumikovning ushbu taktikasiga hech bir jamoa chora topa olmadi. Balki rossiyalik mutaxassis “Qaysar”da ham “Andijon”da qo‘llagan uslubini yana amalga tatbiq etib, muvaffaqiyat qozonishni o‘ylayotgandir-a?