Винисиус “Реал”га муаммо қиляпти. Оқибати ёмон бўлиши мумкин...

“Реал” ва Винисиус Жуниор муносабатларида зиддият келиб чиқиши эҳтимоли ошиб бормоқда. Бу бразилиялик юлдузнинг талаблари ошиб бораётгани билан боғлиқ.

Винисиус ўзини яхшиланган шартномага лойиқ, деб ҳисобламоқда ва имкон қадар кўпроқ пул ишлаб олмоқчи.

“Реал” раҳбарияти унинг талаби билан клубнинг маошлар бўйича сиёсатини бузмоқчи эмас. Улар ҳужумчи ўундоқ ҳам жамоанинг бошқа етакчиларидан кам бўлмаган маош олаётганини таъкидламоқда. Айнан талаб ва таклифнинг бир бирига тўғри келмаётгани ўзаро ҳамкорликни 2029 йилнинг ярмигача узайтиришга тўсқинлик қиляпти.

Винисиус Жуниорда яна бир ғалати режа бор. Саудия Арабистони клублари катта ваъдалар билан уни ўйлантириб қўйган. 24 ёшли футболчи орада икки мавсум Саудия Профессионал лигасида ўйнаб келмоқчи. Бунинг учун “Реал” уни яна ортга қайтариб олишини кафолатлаши талаб этилмоқда.

Бу вазиятда кўп нарса “Қироллик клуби” президенти Флорентино Переснинг қарорига боғлиқ. Бироқ у ҳам бир футболчи талаби билан клубдаги барқарорлик ва соғлом муҳитнинг бузилишига йўл қўймоқчи эмас.