Виталий Левченко: "Апелляция берсак қандай ўзгариш бўлади? Ўйинни бошқа ўтказиб берадими?

“Бунёдкор” – “Нефтчи” (2:1) учрашувидан кейин меҳмонлар бош мураббийи Виталий Левченко саволларга жавоб қайтарди.

- Ўйин ҳақида қўп ҳам гапирмоқчи эмасман. Майдонда бир қатор тушунарсиз қарорлар рўй берди. Қандай қилиб бундай қарор қабул қилишмоқда? Мен тушуниб турибман, лекин сизларга айтмоқчи эмасман. Футболни биладиганлар кўриб, тушуниб турибсизлар, бошқа фикрим йўқ.

- Майдонда рўй берган ҳолатлар учун раҳбарият апелляция беришни режалаштиряптими?

- Апелляция берсак, қандай ўзгариш бўлади? Уч очкони қайтариб берадими ёки ўйинни бошқа ўтказиб берадими? Одамлар кўрми, ВАР кўрми, ҳакам кўрми ёки қанот ҳаками кўрми? Айтяпман-ку, ҳамма футболни кўриб, тушуниб турибди. Мен буни анча олдин тушуниб бўлдим. Лекин гапиришни хоҳламайман.

- “Нефтчи” жамоаси бу мавсумда Суперлигада бир қатор учрашувларда ҳакамларнинг қарорларидан жабр кўрди. Мисол учун “Андижон” билан учрашувда “Нефтчи”нинг голи ҳисобга олинмади. Жамоа ҳакамлардан азият чекяптими?

- Гапларим ҳеч нимани ўзгартирмайди. Бу вазиятларни муҳокама қиладиган ташкилот бор. Қарор чиқарадиган одамлар бор. Бу ҳозир бошлангани йўқ, анча олдин бошланган. “Бухоро” билан ўйинда бўлган пенальтидаги вазият, ОКМК билан бўлган баҳсда қизил карточка бекор қилинган, фарқи борми? Сакраяпти, икки оёғида зарба билан, тўп бошқа жойда. Саволлар қўп, ҳаммасига жавоб бермоқчимасман. Кимлардир тушуниб турибди.

- “Нефтчи” бу мағлубиятдан сўнг энди чемпионлик пойгасидан чиқиб кетдими?

- “Нефтчи”ни чемпионлик пойгасидан чиқариб ташлашди. Фолни сиз кўрдингизми, ўйинчига қўпол ўйнаётганини. ОКМК билан ўйиндаги фолни, у ерда қўпол ўйнаяптими? Тортишувли-а? Тўғри оёққа сакрамоқда, қон оқмоқда, қизил карточка бормиди? Ҳозир кўряпман, тўп ўйинчини қўлига тегяпти, ҳатто ВАР кўришни хоҳламади. Қўл табиий ҳолатда дейишмоқда. Қандай қилиб, кўриниб турибдию, мен биламан ким бундай қилаётганини. Шунчаки, сизларга айтмоқчимасман. “Нефтчи”ни тўхтатиш керакми ёки нима керак?