Виталий Левченко: "Мухлислар жамоага куч бера олишди"

“Нефтчи” – “Андижон” (2:2) учрашувидан кейинги матбуот анжуманининг иккинчи қисмида мезбонлар устози Виталий Левченко қатнашди.

- Бугун ҳақиқий дерби бўлди. Биз Ўзбекистондамиз, аммо гўёки Италия, Францияда бўлгандек туюлди, менга. Мухлислар шундай атмосфера яратишдики, албатта сен бундай ўйинда ҳаракат қилишинг керак. Бизга жуда қийин бўлди. Чунки 2:0 ҳисобида ютқазаётгандик. Йигитларга жуда кучли хоҳиши учун уларга алоҳида раҳмат. Мухлислар жамоага куч бера олишди. Улар қўлларидан келганича курашишди. Андижондан келган мухлислар  ва “Нефтчи”нинг мухлислар ҳақиқий дербига хос учрашувни кўрдилар.

- Иккинчи бўлим охирида тезкор ўйин кўрдик. Бу тактика билан боғлиқми?

- Сиз эътибор қаратдингизми, “Андижон” ҳимоячилари бўйдор эдилар. Биринчи таймда ҳавода ҳам, пастда ҳам курашлар кечди. Рақибнинг айрим футболчилари чарчаб қолишгани сабабли тезкор ўйинчиларни майдонга туширдик. Бир қатор вазиятларда прессинг қилдик. Иккита тўп фарқи билан ютқазаётиб вазиятни ижобий томонга ўзгартира олдик.

- Манучехр Сафаровнинг ўйинидан қониқяпсизми?

- Ким терма жамоада бўлган бўлса, албатта уларда “нагрузка” бўлади. Жалолиддинов, Сафаровда ҳам кўрдик. Жамоа муҳитига қўшилиб олиш учун озгина вақт керак. Манучехр кўнгилдагидек ўйнади, деб ўйлайман. У рақибга босим ўтказишда ҳам фаол бўлди. Унга алоҳида эътирозим йўқ.

- Ҳужумда “Нефтчи”га нима етишмади?

- Креативлик етишмади. Биринчи таймда яхши вазият бўлганди, бундан фойдалана олмадик. Менимча, бундай имкониятлардан гол уриш керак холос.

- Нима деб ўйлайсиз, жамоага Норчаев етишмадими?

- Албатта. Унга соғлик тилаймиз, бироз жароҳати бор эди. Тезроқ соғайиб сафга қайтишини истаймиз. Олдинда Олимпиада ўйинлари бор. Яхшироқ тайёргарлик кўриш керак.

- “Навбаҳор” билан учрашувгача тайёр бўладими?

- Назаримда йўқ. Унга бироз вақт керак.

“Андижон” матбуот хизмати.