Виталий Левченко: "Натижа адолатли"

Суперлиганинг 21-турида "Нефтчи" жамоаси ўз майдонида "Навбаҳор"ни қабул қилди ва 2:2 ҳисобида дуранг ўйнади. Беллашувдан сўнг жамоа бош мураббийи Виталий Левченко матбуот анжуманида иштирок этди.

- Ўйин икки жамоа учун ҳам кескин ўтди. Натижа адолатли. Ҳисоб майдондаги ўйиндан келиб чиқди.

- Ўтказиб юборилган гол ҳақида?!

- Такрорлашдан чарчадим. Тўпни қанча вақт ушлаб турганингиз ва қанча пас берганингиз муҳим эмас. Тайм сўнггида, биз ҳисобда олдинда бораётган эдик. "Навбаҳор"ни "Динамо"га қарши ўйинини эсланг, жамоа қанча ҳужум қилди? Натижа 1:0 бўлди холос. Ваҳоланки, бунча имкониятдан сўнг камида 3:0 ёки 4:0 бўлиши керак эди. Италиядаги футболни томоша қиласизми? У ерда битта ҳужум, гол ва ўйин тугайди. Жамоанинг қандай ўйнаётганини айтиб бериш учун бошқа одам топинг. Дерби доим кескин ўтган. Бу ерда совуқ мия билан ҳал қилиш керак. Ким ўз ҳисларини назорат қилса, ўша томон ғалаба қозонади.