Витинья: "Иккинчи ўрин бизга ёқмайди, лекин мавсумни яхши бошладик"

ПСЖ ярим ҳимоячиси Витинья жамоанинг жорий мавсумдаги иштирокини баҳолади.

"Мавсумни яхши бошладик. Албатта, лигада иккинчи ўриндамиз ва бу бизга ёқмайди. Ҳар доимгидек, биринчи бўлишни истаймиз. Лекин мавсум бошига бир неча омиллар таъсир қилди: ўтган мавсум оқибатлари, қисқа танаффус, чарчоқ, жароҳатлар сони ва энг муҳими — бирорта ўйинни оптимал таркибда ўтказмаганимиз.

Мавсум бошига таъсир қилувчи жиҳатлар кўп. Шуларни, шунингдек, Чемпионлар лигаси ва чемпионатдаги ҳолатимизни инобатга олсак, бу яхши старт деб ўйлайман. Албатта, иккинчи ўрин бизга ёқмайди ва биринчи ўринга қайта чиқиш учун қўлимиздан келган ҳамма ишни қиламиз", — деди Витинья.

Парижликлар Лига 1да 30 очко тўплаб, жадвалда 2-ўринни эгаллаб турибди. Улар пешқадам "Ланс"дан бир очко орқада. Чемпионлар лигасида эса франциялик клуб 12 очко билан умумий босқичда 2-ўринни эгаллаб турибди.