Владимир Бубанья: "Ўйиндан сўнг шифокордан узр сўрадим"

“Андижон” ҳимоячиси Владимир Бубанья "Металлург"га қарши учрашувдан сўнг ўз фикрлари билан ўртоқлашди.

- Владимир, аввало, “Металлург” билан ўйиннинг иккинчи бўлимида юз берган вазиятга изоҳ бериб ўтсангиз.

- Ўша вазият ҳақида нима дейишни ҳам билмайман. Бу ўйин пайтида юз берадиган хис ҳаяжонли ҳолатдир. Ўйиндан сўнг ўша шифокордан кечирим сўрадим. Ўйлайманки, мен бирор ёмон иш қилганим йўқ. Шунчаки, майдонда ётган одамни чизиқ ортига олиб ўтиб қўйдим холос.

- Албатта, сиз унга қўполлик қилиш ниятида бўлмагансиз. Ўйиндан кейин эса рақиб жамоа бош мураббийи билан гаплашиб тургандингиз...

- Учрашувдан кейин рақиб жамоа мураббийи билан кўришиб, ундан ҳам кечирим сўрашни унутганим йўқ ва узримни қабул қилди. Яна кейинги ўйинлар ҳақида гаплашдик. Оддий футбол ҳақидаги суҳбат бўлди ва бир-биримизга омад тиладик.

- Шу куни стадион мухлислар билан тўлиб-тошди. Атмосферага гап бўлиши мумкин эмасди. Табиийки, улар ҳамма вақт ўз жамоасидан ғалабани кутишади. Шундай экан, ишқибозларга нима деган бўлардингиз?

- Ҳа, мен яна шуни айтаманки, бизнинг жамоа ишқибозлари нафақат Ўзбекистонда, балки Осиёдаги энг яхшиларидир. Бизни қўллаб-қувватлаб туришгани учун уларга катта раҳмат. Ўз навбатида биз ҳам ўйинимиз ва яхши натижаларимиз орқали уларга жавоб қайтаришни хоҳлаймиз. Албатта, баъзида буни уддалайсан, гоҳида эса ҳаммаси кутганингдек чиқмайди. Бу – футбол.

- Қайд этилган дурангдан қандай хулоса чиқардинглар?

- Ҳа, биз ўша ўйинни ютишни жуда ҳам истагандик. Лекин бахтга қарши бундай бўлмади. Ўша учрашувни яхши савияда ўтказа олмаганимизни тан оламан. Бундан сўнг машғулотларда ўз ўйинимизни янада яхшилаш учун ҳаракат қиламиз.