Хаби Алонсо Модричнинг ўрнига иккита зўр ўйинчи топиб қўйди

“Реал”да 2012 йилдан бери тўп тепиб келаётган Лука Модрич 15 июнь куни бошланиб, бир ой давом этадиган клублар ўртасидаги жаҳон чемпионатидан кейин жамоани тарк этиши ҳақида маълумотлар тарқатилди.

Cadena Ser нашрининг маълум қилишича, “Қироллик клуби” 39 ёшли плеймейкер ўрнига иккита ўйинчини мўлжаллаб қўйган.

Мадридликлар бу позицияга аргентиналик чарм тўп усталари – “Челси” вакили Энцо Фернандес ва “Байер” ўйинчиси Эксекиэль Паласиосни олиб келмоқчи. “Реал”ни қабул қилиб олаётган Хаби Алонсо ҳар икки футболчи номзодини маъқуллаган.

Трансфер мутахассисларнинг таъкидлашича, Хаби Алонсо Леверкузенда ўзининг қўл остида ўйнаёган Паласиоснинг имкониятларини яхши билади. Бироқ агар “Челси” Конференциялар лигаси финалида “Бетис”ни енголмаса ёки АПЛ якунига кўра, Европа Чемпионлар лигасига чиқолмаса, “Реал” мутасаддиларида Фернандесни қўлга киритиш имконияти сезиларли даражада ошади.