Xanchjou-2022: O‘zbekiston delegatsiyasi rekordni yangiladi!
Xanchjoudagi Para Osiyo o‘yinlari yakuniga etdi! Unda ishtirok etgan O‘zbekiston delegatsiyasi 25 ta oltin, 24 ta kumush va 30 ta bronza, jami 79 ta medalni qo‘lga kiritdi. E’tiborlisi, bu O‘zbekiston delegatsiyasining Para Osiyo o‘yinlari tarixida medallar soni bo‘yicha eng yaxshi natijasi bo‘ldi.
IV Para Osiyo o‘yinlarida 44 ta davlatdan tashrif buyurgan 3 ming 800 nafar sportchilar 22 ta para sport turlaridan, shu jumladan, O‘zbekiston sport delegatsiyasi 11 ta para sport turi bo‘yicha 103 nafar sportchi bilan ishtirok etdi.
Mamlakatimizda Milliy paralimpiya harakatini rivojlantirishdagi tashabbuslar samarasi Para Osiyo o‘yinlarining ilk kunlaridayoq o‘z ifodasini topdi.
Natijada, para atletlarimiz tomonidan 79 ta medallar qo‘lga kiritildi hamda 25 marotaba milliy g‘ururimiz va iftihorimiz bo‘lgan Vatanimiz madhiyasi yangrashiga sabab bo‘ldi.
Para kanoechilarimiz tomonidan esa ushbu Para Osiyo o‘yinlarida rekord natija o‘rnatilib, umumjamoa hisobida 1-o‘rin qo‘lga kiritildi.
Shuningdek, 3 nafar para engil atletikachilarimiz Para Osiyo o‘yinlari rekordini yangiladi.
Para suzish bo‘yicha erkaklar o‘rtasida o‘tkazilgan musobaqalarda shohsupaning uchchala o‘rnini mamlakatimiz sportchilari egalladi.
Fikrlar