Хави Симонс: «Биз барча мусобақаларда ғолиб чиқмоқчимиз»

«Тоттенхэм»нинг ҳужумкор ярим ҳимоячиси Хави Симонс Лондон клубининг мақсад ва режалари ҳақида кескин баёнот берди.

— Менинг мақсадларим жамоа ва клубнинг амбициялари билан тўлиқ мос. Биз иштирок этадиган барча мусобақаларда ғолиб чиқишни истаймиз, — деди Симонс журналист Мэтт Барлоуга берган интервьюсида.

Хави Симонс ўтган ёзда «шпорлар» сафига қўшилган эди. У клуб билан 2030 йилгача мўлжалланган меҳнат шартномасига имзо чеккан.

2025/26 йилги Англия чемпионати якунларига кўра, лондонликлар жадвалда 17-ўринни эгаллаб, 41 очко тўплади. Жамоа фақат мусобақанинг сўнгги босқичидагина элита дивизионида қолишни таъминлай олди.

Янги мавсум Англия Премьер-лигасида август ойининг иккинчи ярмида старт олиши кутилмоқда. Бироқ Симонс жароҳати туфайли мусобақанинг катта қисмини ўтказиб юбориши аниқ.