Хайрулла Ҳамидов Жаҳон чемпионатида Ўзбекистоннинг энг хавфли рақибини айтди

АҚШ, Канада ва Мексика мезбонлик қиладиган навбатдаги Жаҳон чемпионатининг гуруҳ босқичи учун қуръа ташланди. Ўзбекистон терма жамоаси “К” гуруҳидан жой олди ва Португалия, Колумбия ҳамда Конго/Ямайка/Янги Каледония жамоалари билан баҳс олиб боради.

Таниқли футбол шарҳловчиси Хайрулла Ҳамидов Sports.uz сайтига берган интервьюсида Фабио Каннаваро бошчилигидаги жамоанинг гуруҳдаги асосий рақиби Колумбия эканлигини таъкидлади.

"Менинг хавотирим Португалия эмас. Хавотирим 1-турда бўлиб ўтадиган Колумбияга қарши учрашув. Сабаби — ўйин Мексикада бўлади ва стадионнинг 95 фоизи колумбиялик мухлислар билан тўлади. Фабио Каннаваро биринчи ўйиндагина катта синовга дуч келмоқда. Колумбия Португалия терма жамоасини ҳам ютиши мумкин, чунки таркиби яхши шаклланган. Биз Роналду билан ва Роналдусиз Португалияни айтамиз-ку, лекин уларда бу нарса йўқ. Колумбиянинг ҳужум чизиғида прессингда айни пайтда жаҳоннинг энг кучли футболчиларидан бири Луис Диас ўйнамоқда. Хамес Родригес эса фақат Жаҳон чемпионатида “чой қайнатадиган жин”. Турнирда қандайдир супер голлар уриб қўйиши мумкин ва Луис Суарес деган тинимсиз гол урадиган ҳужумчиси бор. Шунингдек, таркибда Жон Дуран ҳам бор. Уларнинг ҳужум учлигининг ўзи қўрқинчли. Шунинг учун Колумбия билан ўйинимиз энг хавфлиси бўлади",- деди шарҳловчи.