Холанд жаҳон футболида аср рекордини ўрнатди

2026 йилги жаҳон чемпионатининг Европа минтақаси учун ўтказилаётган саралаш турнири доирасида “I” гуруҳида иштирок этаётган Норвегия терма жамоаси ўз майдонида Молдова футболчиларини қабул қилди.

Голларга бой бўлган ушбу баҳсда мезбонлар 11:1 ҳисобида зафар қучди. Шу куни рақиб дарвозасига бешта тўп киритиб, жамоадошларига иккита голли пас узатган Эрлинг Холанд ўйин қаҳрамони бўлди.

ФИФА расмий сайтининг маълум қилишича, Холанд XXI асрда жаҳон чемпионатлари саралаш турнирида пента-трик қайд этган биринчи футболчига айланди.

Илгари бундай натижа бир марта кузатилган.  1977 йили Ханс Кранкль Австрия ва Мальта терма жамоалари ўртасидаги баҳсда ўз ҳисобига бешта гол ёздириб қўйган.