Холанд жамоага ким етишмаётганини айтди

“Манчестер Сити” тўпурари Эрлинг Холанд ўтган мавсум якунланиши билан “шаҳарликлар” сафини тарк этган бельгиялик плеймейкер Кевин де Брюйне ҳақида гапирди.

- Кевин де Брюйне “Манчестер Сити”нинг ҳаққий афсонаси. Биз уни ҳар куни соғинамиз. Жамоага Кевин етишмаяпти.

Мен бир кун келиб, унинг ўрнида бўлишим аниқ эканини биламан. Чунки футбол абадий эмас.

Кевин клубда ажойиб ўн йилни ўтказди. “Сити” учун борини берди ва барча совринларни қўлга киритди. Шу боис, Кевиннинг ўрни билинаётгани табиий ҳол, - деди Эрлинг Холанд.

Кевин де Брюйне  2015 – 2025 йиллар давомида “Манчестер Сити” шарафини ҳимоя қилди. Бу вақт мобайнида 34 ёшли футболчи жами 422 та учрашувда қатнашиб, ўз ҳисобига 108 та гол ва 177 та ассист ёздириб қўйди.

Кевин Манчестердан кетганидан кейин эркин агент мақомида Италиянинг “Наполи” клуби билан икки йиллик шартнома имзолади.