Холанднинг “Реал”га ўтишига уч омил халақит қилади

“Реал” президенти Флорентино Перес жамоага норвегиялик тўпурари Эрлинг Холандни олиб келишни орзу қиляпти. Аслида “Қироллик клуби” бир неча йил аввал ҳам уни Мадридга чақирган эди. Ўшанда Холанд “Боруссия Дортмунд”дан “Манчестер Сити”га ўтишни маъқул кўрган.

Ўз навбатида, Эрлинг Холанд ҳам “Реал”да ўйнашга мойиллигини яширмаган ва асосий мақсадларидан бирини рўёбга чиқаришга қарши эмаслиги айтиляпти.

Флорентино Перес Эрлингни 2026 йилнинг ёзида “Реал”га олиб келиш учун унинг агентлари билан алоқа ўрнатган.

Трансферлар бўйича экспертларнинг таъкидлашича, “Реал” бу режасини амалга ошириши учун энг катта учта маласани ҳал қилиши керак.

Биринчидан, Холанднинг “Манчестер Сити” билан 2034 йилнинг ёзигача амал қилувчи узоқ муддатли шартномаси бор. Унга кўра, футболчи ҳафтасига 500 минг фунт стерлинг атрофида маош олмоқда.

Иккинчидан, бу трансфер амалга ошиши учун Мадрид жамоасини Винисиус Жуниор тарк этиши керак бўлади.

Учинчидан, Холанднинг трансфери учун “Реал” 500 миллион евродан ортиқ маблағ сарфлашига тўғри келади.