Хомяков мухлислардан узр сўради ва уларни сабрли бўлишга чақирмоқда

Суперлиганинг 11-турида бира тўла икки нафар бош мураббий янги жамоаларида дебют учрашувларини ўтказишди. Масалан, Муҳсин Муҳаммадиев «Бухоро»да, Александр Хомяков эса «Андижон»да иш бошлаганидан хабардорсиз. Лекин иккала мураббий ҳам дебютида ғалаба нашидасини суришмади. Айниқса, Муҳаммадиевнинг «Бухоро»даги илк ўйини жуда омадсиз чиқди ва ўз майдонида «Пахтакор»дан қақшатгич мағлубиятни қабул қилиб олишди – 0:5. «Андижон» бўлса, ўз уйида Хомяков бошчилигида «Металлург»га қарши баҳсда тайёр ғалабани қўлдан чиқарди ва якунда беллашув дуранг билан тугади.

Очиғи, андижонликлар янги мураббий бошчилигида 11-турда илк ғалабасини тантана қилишлари кутилаётганди. Бироқ бу нарса амалга ошмай қолди. Табиийки, бундан Хомяков ҳам ранжигани рост. Жамоанинг янги бош мураббийи эса беллашув тўғрисида умумий ҳолатдаги таассуротларини қуйидагича изоҳлади:

- Ҳаммаси тушунарли, якуний натижадан умуман кўнглим тўлмади. Чунки «Андижон»даги дебют ўйинимни ғалаба билан тамомлашни жуда истагандим. Ўз навбатида бундай истакни футболчиларимизнинг юзидан ҳам билиб олишим мумкин эди. Масалага обьектив равишда ёндашадиган бўлсак, ўйинни ғалаба билан тамомлашга бўлган истак жуда юқори эди. Ўз навбатида уч очкони қўлга киритиш илинжида тўп сурдик. Бахтга қарши бир қанча вазиятларда ҳужумлардаги ҳаракатларимиз қовушмади. Айниқса, ҳимоядан ҳужумга ўтиш пайтидаги ҳаракатларимиздан унчалик қониққаним йўқ. Ўйиннинг иккинчи ярмида негадир биз кўпроқ ҳимояландик. Шундай экан, 1:1 ҳисобидаги дурангни ҳаққоний, учрашувга мос келадиган натижа деб биламан. Яна такрорлайман: ҳимоядан ҳужумга ўтиш пайтидаги футболчиларимизнинг ҳатти-ҳаракатларидан мутлақо қониқмадим. Бундай ҳаракатлар билан ғалаба қозониш амримаҳол. Яна такрорлашимга тўғри келади, натижа ҳаққоний.

Албатта, россиялик мутахассис ўзи таъкидлаганидек, «Андижон»даги дебют учрашувида ғалаба қозонишни жуда-жуда хоҳлаганини тан олди. Бунинг устига мураббий алмашгач, мухлислар ҳам жамоадан янада тажовузкор ва ранг-барнг ўйинни кутишганди. Аммо аксига олиб, шу куни андижонликларнинг ўйини яна эски манзарини эслатиб юборди. Яъни, мураббий алмашгач, ҳамма қандайдир ўзгаришларни кутишганди. Лекин қайд этилган ҳисоб ҳам шуни кўрсатадики, ҳозирча ҳаммаси ўша-ўша. Бу масалада эса Александр Андреевич ҳам фикрларимизга қўшилди.

- Мен ҳам фикрингизга тўла қўшиламан. Учрашувга тайёргарлик ишлари жуда ўзгача руҳда кечди. Биз машғулотларда кўпроқ ҳужумдаги ўйинлар чоғида қандай ҳаракатланиш кераклиги устида кўпроқ ишладик. Ўз ўрнида ҳимояни ҳам унутиб қўймай, асосан марказни мустаҳкамлашга эътибор қаратдик. Лекин негадир баҳс чоғида машғулотлардаги тер тўкишнинг самарасини кўрмадим. Қолаверса, ўзимни сеҳргар деб ҳисобламайман. Негаки, қисқа фурсат оралиғида ҳаммасини бирданига ўзгартириб юборишнинг асло иложи йўқ. Боз устига жамоа кўникиб қолган ўзига хос услуб бор. Табиийки, бундай шароитда янги мураббийга осон бўлмайди. Жамоага келганимга кўп бўлмади. Ўйлайманки, қаршимдаги асосий вазифа қўл остимда бўлган футболчилар билан янада яқинроқ танишишдан иборат. Шундагина уларга ўйинни ташкил этиш борасидаги ўз фалсафам нималардан иборат эканлигини батафсил тушунтириб бера оламан. Мен кўпроқ ҳужумкор ва тажовузкор футболни ёқтираман. Ўз ўрнида бундай ўйин эвазига ишқибозларни стадионга кўпроқ чорлаш мумкин бўлади. «Металлург»га қарши учрашув натижаси стадионга йиғилган маҳаллий мухлисларни тўла қаноатлантирмаганлигини тушуниб турибман ва бунинг учун улардан узр сўрайман. Ахир биз уларни ғалаба билан хурсанд қила олмадик. Бошқа томондан олиб қараганда, клубдаги янги одам бўлганим учун мухлислардан бироз сабрлироқ бўлишлари кераклигини сўраб қоламан.

Хомяков тўғри гапирди, у сеҳргар мураббий эмас. Бундан ташқари, андижонликлар учун у янги мураббий ва ўз ўйин фалсафасини шакллантириши учун хоҳлаймизми-йўқми, барибир вақт талаб этилади. Бунинг устига ҳозирги таркибни ўзи тузмаган. Балки биринчи даврадан кейин у таркибда ўзи кўришни истаган футболчиларни жалб қилиши ҳам мумкин.

- Ҳозирча бу хусусида гапиришга анча эрта. Биз мураббийлар ўйинчилардан нимани кутаётганимизни иложи борича уларга етказишга ҳаракат қиляпмиз. Юқорида айтганимдек, қўл остимдаги футболчиларни яқиндан билиб олишим учун улар билан кўпроқ мулоқот қилишим керак бўлади. Шу сабаб асосий урғуни навбатдаги учрашувга тайёргарлик кўришга берган ҳолда ишлаймиз. Таркибда сезиларли ўзгаришлар амалга ошадими, деган саволга жавоб қайтаришимга ҳали анча бор, - дея муносабат билдирди.

Александр Андреевич «Андижон»даги ўзининг иккинчи учрашувини эртага Ўзбекистон Кубоги доирасида «Бухоро»га қарши ўтказади. Албатта, бу Суперлига беллашуви ҳисобланмайди. Баъзи жамоалар эса асосий эътиборини Ўзбекистон Кубоги ёки Лига Кубогига эмас, балки Суперлигага қаратади. Бу борада Хомяков қандай йўл тутади? Унинг учун эртанги беллашув қандай аҳамиятга эга экан? Бу масалада бош мураббий шундай фикр билдирди:

- Биласизми, биз учун ҳаммасидан кўра ғалаба нашидасини ҳис этиш муҳимроқ. Шундай экан, ўйинларни ажратиб ўтирмоқчи эмасмиз. Албатта, Ўзбекистон Кубоги доирасида ўтадиган учрашувга фақат ғалаба қозониш илинжида майдонга тушамиз. Фақат ғалабагина футболчиларда ўз кучига бўлган ишончни ва иштиёқни қайтариши мумкин. Тўғри, навбатдаги беллашувга ҳеч қанча вақт қолгани йўқ. Шу боис тайёргарлик кўриш учун вақт зиқ. Шундан келиб чиққан ҳолда бўлажак беллашувга иложи борича яхшироқ тайёргарлик кўришга ҳаракат қиламиз.