Хушнудбек Худойбердиев: Омадимиз келса, 0:0. Омадимиз келмаса...

Хабарингиз бор, бугун Ўзбекистон миллий терма жамоаси Жаҳон чемпионати-2026 саралаши доирасида Эрон терма жамоаси билан ўйнайди. Ушбу учрашув олдидан футбол жамоатчилиги, шунингдек, жамоат арбоби саналган бошқа соҳа вакилларининг учрашув ҳақидаги тахминлари билан қизиқдик.

Қуйида ҳуқуқшунос, блогер ҳамда Миллий масс-медиани қўллаб-қувватлаш ва ривожлантириш жамоат фонди директори Хушнудбек Худойбердиевнинг ўйинолди фикрлари билан танишиб чиқишингиз мумкин. 

Эртанги учрашувда терма жамоамизни ғалаба қозонишига ишоняпсизми? 

- Ишонмаяпман, лекин умид ва дуо қиляпман

Ўйин жараёни сизнингча қандай кечади? 

- Жуда қийин. Менимча, саралаш босқичидаги энг оғир ўйин бўлади. Биринчидан, Эрон ўз мухлислари кўз ўнгида Жаҳон чемпионати йўлланмасини йирик ҳисобда ғалаба қозониб, қўлга киритишни хоҳлайди. Шу сабабли, масалан, 1:0 ютаётган бўлса ҳам, ҳужум қилишда давом этаверса керак. Иккинчидан, Эрон учун биз принципиал рақибмиз, мусобақанинг аҳамияти ва даражасидан қатъи назар, улар доим биз билан муросасиз ўйнашади.

- Тахминан, қандай ҳисоб қайд этилади ва кимлар гол уради?

- Омадимиз келса, 0:0 дурангни сақлаб қоламиз. Омадимиз келмаса, 2:0 ёки 3:0 бўлиши мумкин. Илоҳим, омадимиз келсин.

- Умумийроқ савол. Термамизнинг иккинчи ўринни олиб, Жаҳон чемпионатига чиқиш имконятини қандай баҳолайсиз?

- 60%. Айрим нашрлар Ўзбекистон имконияти 90% дан баланд баҳолаётгани мени ҳайрон қолдирмоқда. Вазиятга реал қарасак, бундай катта имкониятимиз йўқ. Масалан, Эронга ўхшаб биттагина дуранг, ёки ҳаттоки биттагина ғалаба ҳам бизни ЖЧга олиб чиқа олмаслиги мумкин. Аҳамиятлиси, 8-турдан кейин бизнинг имкониятимиз кўпайиш ўрнига пасайиши ҳам мумкин. Масалан, Эрондан ютқазсагу, БАА ва Қатар ютса, имкониятимиз 50% га тушади. Мабодо, Худо кўрсатмасин, БААдан ҳам ютқазиб қўйсак, унда 20-25% га тушиб кетади. Хуллас, бизни жуда қийин 3та ўйин кутиб турибди.