Яна 3 очко ва "Андижон" Суперлигада ёхуд гапининг устидан чиқаётган Кумиков тузган "армия" ҳақида нималарни биласиз?

Ўтган йили омадсизлик туфайли Суперлигани тарк этган “Андижон” бир йиллик танаффусдан сўнг яна элитага қайтмоқда. Ҳа, ўзининг жонкуяр, ашаддий мухлислари билан танилган “Бургутлар” энди бир оёғи билан Суперлигада. 16 октябрь куни Урганчда “Хоразм” устидан эришган ғалабасидан кейин андижонликлар манзил томон деярли етиб келди.

Ёдимизда, Виктор Кумиков жамоаси мавсумни у қадар ишончли бошлай олмаганди. Биринчи турда “Зомин” майдонида 0:0 ўйнади. Ўз уйида “Янгиер”ни таслим қилгач, 3-турда “Хоразм”нинг сунъий қопламали майдонида андижонликлар ўз дарвозасидан жавобсиз 3 та тўп олиб чиқди. Биз буни нега эсга оляпмиз? Ўшанда “Андижон”нинг кучига шубҳа билан қараганлар топилди. “Машъал”, “Турон” каби клублар анча вақт пешқадамлик қилиб келишди. Лекин халқимизда жўжани кузда санаймиз, деган ажойиб нақл бор-а? Октябрь ойидамиз ва “Андижон” жуда катта фарқ билан рақибларини ортда қолдириб, якка пешқадамликни ўз қўлида сақлаб турибди. Жамоанинг ҳар бир ғалабаси Суперлига сари қадам-бақадам яқинлаштириб келяпти.

Жамоа аъзолари қишда Туркияда ўқув-машғулот йиғинини ўтказишган. Ушбу хориж йиғини ҳам фойдали бўлгани ўз самарасини беряпти. “Андижон” жисмоний томонлама энг яхшиси. Бош мураббий Виктор Кумиков шундай “армия” туздики, уни ҳеч ким ёриб ўтолмаяпти. Бир нарсани аниқ айтиш мумкин, россиялик мутахассис қишки йиғиндан бошлаб таркибни шакллантиришда ва селекция ишларида ўзининг режасига асосан иш олиб борди. Ўйин схемаси йиғилган футболчиларнинг техник салоҳиятига қараб ҳам қўлланилди. Ҳамма Кумиковнинг тактикасини билади: стандартлар жамоанинг асосий қуролига айланган. Эътибор берсангиз, про лига ёки Суперлигадаги мураббийлар “Андижон” ҳақида гапирганларида улар асосан стандартлардан, бурчак ва аутлар орқали жарима зарбаларини амалга оширганда хавфли дейишади. Кўряпсизми, ҳамма билади, “Бургутлар”нинг қандай ўйин кўрсатишини. Лекин барчаси оғизда гапиришади, амалда ҳеч қанақа қаршилик кўрсата олишмаяпти. “Андижон” барибир ўз ўйинларида рақибларини кўпинча ўзининг ўша асосий қуроли – стандартлардан гол уриш орқали мағлуб этиб келмоқда. Қанотлардан тўп узатилиши, жарима зарбалари, бурчак зарбалари ёки аутдан тўп узатилишидан кейин андижонликлар албатта гол уриб кетишяпти.

Бу вазиятда ҳимоячилар ҳам рақиб жарима майдони ичида қўшимча ҳужумчиларга айланишяпти. Хўш, ҳамма “Андижон”нинг услубини билар экан, унда нега уларга қарши бирор чора қўллай олмаяптилар? Мураббийлар стандартларини биламиз дейишяптими, унда нимага “Андижон”ни зарарсизлантира олмаяпти? Бу ерда гап Кумиков ва унинг жамоаси ўз ишини моҳирона бажараётгани билан боғлиқ. Қолаверса, тактик ўйин ҳам бу вазиятда муҳим аҳамият касб этмоқда. “Андижон” ҳисобда олдинда бораётган маҳалда тактик томонлама қандай ҳаракатланишни “сув қилиб ичиб юборган”. Кўриб турибмиз, стандартларни амалга оширишни ҳамма ҳам эплай олмаяпти-ку! Лекин бу борада чиндан ҳам “Андижон” футболчиларининг “устаси фаранг” эканликлари яна бир бор ўз сўзини айтяпти. Оқибатда нима бўляпти? Бу жамоа ўзининг услубига содиқлиги ва пухта амалга ошириши эвазига про лигада энг кучлисига айланди ва бир оёғи билан Суперлигада! Мана, сизга энг ишончли ва натижа келтирадиган услуб. Виктор Кумиков “Андижон” билан ўтган йили элитани тарк этганида келаси йили жамоани албатта яна Суперлигага олиб чиқаман, деб айтган сўзи ҳамон ёдимизда турибди. Россиялик мутахассис гапининг устидан чиқяпти.

Куни кеча “Андижон” сафарда “Хоразм”ни мағлуб этиб қайтди. Кўрган бўлсангиз, ўша беллашувда ҳам Кумиков жамоаси тактик томонлама жуда яхши ҳаракат қилди. Чунки рақибни тўлақонли зарарсизлантира олди. Яъни, мезбонларнинг ҳужумларини кўп вазиятларда “блоклади”. Жамоанинг мудофаа чизиғи марказида Илдар Маматказин ва Владимир Бубаньядан ҳосил топган иккита “қоя” бор. Қанот ҳимоячилари худди “мотор” сингари ҳимоя билан ҳужум ўртасида боғловчиликни зўр бажаришяпти. Шунинг учун ҳам “Андижон” про лигада ҳаммадан энг оз гол ўтказди. Умуман олганда, ҳар бир чизиқдаги футболчилар ўзларига юклатилган вазифани бажаришаётгани ва мураббийларнинг кўрсатмаларига тўғри амал қилиб келаётганининг маҳсулини кўриб турибсиз.

Кейинги турда Кумиков жамоаси 24 октябрь куни “Бобур Арена”да “Турон”ни қабул қилади. Вазият шундайки, ҳозир иккала жамоа ўртасида очколар фарки 10 тани ташкил қилмоқда. Ушбу учрашувда “Андижон” навбатдаги уч очкони қўлга киритадиган бўлса, муддатидан илгари Суперлига йўлланмасини нақд қилади ва шу билан бирга 1-ўринни ҳам олдиндан ҳал қилиб қўяди. Шундай экан, “Бургутлар” бўлажак учрашувга жиддий тайёрланишлари аниқ. Қолаверса, “Бобур Арена” ўз эшигини бир ўйинлик дисквалификациядан сўнг яна ашаддий мухлислар учун очади. Барчаси “Андижон”нинг ўз қўлида. Агар 24 октябрь куни жамоа “Турон”ни мағлуб этадиган бўлса, стадионда қандай шодиёна бўлишини ўзингиз тасаввур қилиб кўраверинг!