Yangi bosh murabbiy Fayzullaevning ilk o‘yinini qanday baholadi?
Frantsiya poytaxti Parij shahri mezbonlik qilayotgan Olimpiya o‘yinlarida O‘zbekiston terma jamoasi safida ishtirok etgan Abbosbek Fayzullaev Rosiya Premer-ligasida dastlabki ikkita va Rossiya kubogidagi bitta uchrashuvni o‘tkazib yuborishiga to‘g‘ri kelgandi.
20 yoshli hujumkor futbolchimiz Parijdan Moskvaga qaytganidan keyin qisqa fursatdi rasmiy uchrashuv o‘tkazishiga to‘g‘ri keldi.
TsSKAni yozda qabul qilib olgan serbiyalik mutaxassis Marko Nikolich boshchiligidagi murabbiylar shtabi o‘zbekistonlik legionerni uchinchi turda “Orenburg” bilan bo‘lgan uchrashuvda boshlang‘ich tarkibga kiritdi.
Abbosbekning qadami qutlug‘ kelib, “armiyachilar” gollar shousini namoyish etib berdi. TsSKA o‘z muxlislari ko‘z o‘ngida 5:1 hisobida zafar quchdi. Bir soatdan ko‘proq harakat qilgan Fayzullaev bu gal ham juda faol o‘ynadi.
Uchrashuvdan keyin Marko Nikolich jurnalistlar savollariga javob berib, o‘z jamoasi o‘yinini baholadi.
— Yangi mavsumdagi birinchi uy uchrashuvida g‘alaba qozonishimiz juda muhim edi. Uchta turda 7 ochko jamg‘ardik, bu yomon ko‘rsatkich emas, lekin yanada ko‘proq ochko olish mumkin edi. Ko‘p gol ura oldik. Oldinga intilishda davom etamiz. Bo‘lajak uchrashuv uchun uzoq yo‘l bosishimiz kerak. Bugungi bahsga juda ko‘p tomoshabin keldi.
— Olimpiadadan keyin Abbosbek Fayzullaevning ahvoli qanday? U bugun juda ko‘p hujum tashkil qildi, hammaning e’tiborini tortdi...
— Bu savolga bir xil javob beraman: jamoaviy o‘yin. Bugun tennischi Novak Jokovich Olimpiya o‘yinlarining finalida o‘ynadi, mana shu individual sport, bizniki esa, jamoviy o‘yin.
Bevosita Abbosga kelsak, endi ancha yaxshi ko‘rinyapti, bir juft mash0ulotda qatnasha oldi. Uning holatidan qoniqish hosil qildim.
— “Orenburg”ning dastlabki o‘yinlari, ayniqsa, “Spartak” ustidan g‘alaba qozongani sizni o‘ylantirib qo‘ymadimi?
— “Orenburg” — dastlabki ikki turdan keyin raqib darvozasiga berilgan zarbalar bo‘yicha birinchi o‘rinda turgan jamoa edi. Ular keng maydon bo‘ylab o‘ynashni yaxshi ko‘radi, biz bugun o‘yinni shaxmatchilarga xos tarzda tashkil etishimiz talab qilinardi.
Biz uyushqoq tarzda harakat qilish, to‘pni o‘z nazoratimizda ushlab turishga urindik.
“Orenburg” — juda noqulay raqib. O‘tkazib yuborgan golimizni ham raqib maydondan markazidan to‘pni o‘yinga kiritganidan keyin o‘zimizga o‘zimiz “olib keldik”.
Gollardan keyin bo‘shashib qoldik. Lekin 5:1 qoniqarli natija bo‘lishi kerak.
TsSKA uchinchi turdan keyin etti ochko bilan uchinchi o‘rinda bormoqda. “Armiyachilar” hali ochko yo‘qotmagan ikki klub – amaldagi chempion “Zenit” va Moskvaning “Dinamo” jamoalaridan orqada xolos.
Abbosbek Fayzullaev klubi navbatdagi turni vitse-chempion “Krasnodar” maydonida o‘tkazadi. To‘rtinchi turning markaziy uchrashuvlaridan biri sifatida e’tirof etilayotgan bu bellashuv 10 avgustga belgilangan.
Fikrlar