Legionerlarimiz “Zenit”ning gegemonligiga barham bermoqchi!
Sankt-Peterburgning “Zenit” jamoasi bugungi kunda Rossiyaning eng baquvvat, badavlat va qudratli klubiga aylangan. Piterliklar o‘zining qariyb bir asrlik tarixida hech qachon hozirgidek kuchli jamoa bo‘lmagan.
“Zenit” Rossiya Premer-ligasining o‘n karra g‘olibi hisoblanadi. Piterliklar ketma-ket olti yildan beri chempionlik unvonini hech kimga bermay kelyapti. Moskvaning “Spartak”, “Lokomotiv”, “Dinamo” va TsSKA kabi taniqli jamoalari piterliklarga etarli darajala qarshilik ko‘rsata olmayapti.
Shu bois, har yili mavsum boshlanishi bilan muddatidan oldin “Zenit”ni chempionga chiqarish an’anaga aylanib qoldi.
“Zenit” yangi chempionatni ham zo‘r boshladi. Sergey Semak shogirdlari dastlabki uchta uchrashuvda “Krilya Sovetov”, “Rubin”, “Rostov” jamoalarini yirik hisoblarda taslim qilib, o‘z darvozasini daxlsiz saqlab qolgan holda jami 13 ta gol urdi.
Shunga qaramay, “Rubin” jamoasi safida o‘ynayotgan hamyurtimiz Rustam Ashurmatov jurnalistar bilan suhbatda piterliklarni hozirdanoq chempion sifatida tan olish fikriga qo‘shilmasligini, bu gal boshqa jamoalar etarli darajada qarshilik ko‘rsata olishini bildirdi.
— Keyingi turda sizlar “Zenit”ga 0:5 hisobida yutqazgan “Rostov” bilan o‘ynaysizlar. Bir tur oldin o‘zlaring 0:4 hisobida piterliklardan mag‘lub bo‘lgandinlar. Shunday ekan, Rostovdagi bahsdan nima kutsa bo‘ladi?
— Biz barcha uchrashuvlarga bir xilda, jiddiy e’tibor bilan tayyorgarlik ko‘ramiz. Maydonda qo‘limizdan kelganini qilamiz, g‘alaba uchun boramiz.
— “Zenit” hozirdan chempionmi?
— Hech qanaqasiga bunday emas. Futbolda hamma narsa tez o‘zgaradi. Biz ham, boshqa jamoalar ham oxirigacha kurashadi.
Eslatib o‘tamiz, Rustam Ashurmatov “Bunyodkor” klubi tarbiyalanuvchisi hisoblanadi. Faoliyatining boshida “Qo‘qon-1912” jamoasida ham to‘p tergan. 2019 yili iste’dodli himoyachi Janubiy Koreya chempionatiga yo‘l olib, uch yil davomida “Kvanju” hamda “Kanvon” jamoalarida to‘p tepdi.
Yurtimizga qaytib bir yil “Navbahor”da o‘ynaganidan keyin, 2023 yilning boshida “Rubin”ga ko‘chib o‘tdi va jamoasining birinchi liga g‘olibiga aylanishiga yordam berdi.
28 yoshli himoyachi qozonliklar safida hozirga qadar 27 ta uchrashuvda ishtirok etib, himoyadagi vazifalarini bajarishdan tashqari raqiblar darvozasini uch marotaba ishg‘ol ham qilgan.
Shu o‘rinda, “Rubin” klubi o‘z tarixida ikki bor – 2008 va 2009 yillari Rossiya chempionligini qo‘lga kiritganini eslatib o‘tish lozim. O‘shanda jamoa tarkibida o‘zbekistonlik futbolchilardan himoyachi Andrey Fyodorov va hujumkor futbolchi Vagiz Galiulin ham chempionat oltin medallari bilan taqdirlangan.
Bu yil Rossiya Premer-ligasida jami to‘rt nafar legionerimiz ishtirok etmoqda. Rustam Ashurmatov bilan birga Umarali Rahmonaliev “Rubin” sharafini himoya qilyapti.
Rossiyadagi ikkinchi mavsumini boshlagan Abbosbek Fayzullaev TsSKA etakchisi hisoblanadi. Joriy mavsumdan Sherzod Esonov Premer-liga debyutanti “Akron” futbolchisiga aylandi.
Fikrlar