Yevropaning eng kuchli klubi Diomandeni sotib olishdan nega voz kechganini tushuntirdi

PSJ rahbariyati «RB Leyptsig» jamoasida to‘p surayotgan yarim hujumchi Yan Diomandeni sotib olish bo‘yicha muzokaralarni nega to‘xtatgani haqida rasmiy izoh berdi. Avvalroq ommaviy axborot vositalari futbolchi yaqin kunlarda «Real» safiga qo‘shilishi va Madrid klubida tibbiy ko‘rikdan o‘tishi kutilayotganini xabar qilgan edi.

- «Pari Sen-Jermen» klubi Yan Diomande bo‘yicha rejalaridan rasman voz kechdi va barcha muzokaralarni to‘xtatdi. Taklif etilgan transfer to‘lovi ham, maosh bo‘yicha talablar ham mutlaqo asossiz darajada yuqori edi va bozor barqarorligiga salbiy ta’sir ko‘rsatishi mumkin edi.

PSJ o‘zining qat’iy moliyaviy intizom va muvozanatli tarkib tamoyillaridan chekinmaydi. Oxirgi yillarda eng ko‘p sovrin yutib kelayotgan, ikki karra Chempionlar ligasi g‘olibi sifatida «Pari Sen-Jermen» inflyatsiyani qo‘zg‘aydigan o‘yinlarga yoki ayrim vositachilar manevralariga berilmaydi. 

Klub transfer bozoridagi o‘z strategiyasini xotirjam va ishonch bilan davom ettiradi, — deya fransuz klubi bayonotidan iqtibos keltiradi Marca nashri.

O‘tgan mavsumda Diomande barcha musobaqalar doirasida 36 uchrashuvda maydonga tushib, 13 ta gol urdi va 10 ta golli uzatma amalga oshirdi. Transfermarkt portali ma’lumotlariga ko‘ra, futbolchining bozor qiymati 90 million yevro atrofida baholanmoqda.